Մատենադարանի կտուրի տակից գիտությունը փախել է. Սահակյանը` իրեն մեկուսացնելու ու անտեսելու մասին․ ՏԵՍԱՆՅՈՒԹ

Հուլիսի 17-ին Մատենադարանում տեղի կունենան տնօրենի ընտրություններ: Առաջադրված է երեք թեկնածու` Մատենադարանի տնօրենի ժամանակավոր պաշտոնակատար Կարեն Մաթևոսյանը, ԿԳՄՍ նախարարի տեղակալ Արայիկ Խզմալյանը և բանասիրական ու պատմական գիտությունների դոկտոր, պրոֆեսոր Արծրունի Սահակյանը: Վերջինս Factor TV-ի հետ զրույցում անդրադարձել է ընտրությունների շեմին Մատենադարանում տիրող մթնոլորտին, մյուս թեկնածուներին, կառույցի չռեալիզացված պոտենցիալին:

«Մատենադարանի տնօրենը կարող է դոկտոր չլինել, բայց նրա գիտական թեզը պետք է միջնադարագիտական բնույթ կրի: Մատենադարանի առանձնաշնորհյալ մասնագիտական կողմնորոշումը միջնադարագիտությունն է: Այն երկու հոգին, որոնք Մատենադարանից ընտրվել են հոգաբարձուների խորհրդի կազմում, ևս պետք է միջնադարագետներ լինեին, մինչդեռ նրանցից մեկը նորագույն տեխնոլոգիաների գծով տնօրենի խորհրդական է, մյուսը` պահոցի վարիչ: Նրանց, փաստացի, կոլեկտիվը չընտրեց: Բացի այդ` Մատենադարանի ամենաթիրախային օղակը, մեր աչքի լույսը մեր աչքի առաջ պետք է լինի: Ստացվում է`այդ առթիվ մենք եթե գանգատ, բողոք ունենանք, պետք է հայտնենք հոգաբարձուների այն անդամին, որը նաև պահոցի վարի՞չն է»,-ասում է Արծրունի Սահակյանը:

Նա նշում է, որ այսօր Մատենադարանում հակագիտական մթնոլորտ է ստեղծվել, մարդկային որակներն էլ մղվել են երկրորդ պլան. «Մատենադարանի կտուրի տակից գիտությունը փախել է: Այսօր այս կառույցից ի՞նչ գիտնական եք ճանաչում` ոչ մեկին: Այս կոլեկտիվը կորցրել է իր բուն գիտական կոչումը: Մատենադարանը մեկ անձ` տնօրենը չպետք է ներկայացնի: Հոգաբարձուների խորհրդից բացի` գիտխորհուրդը պետք է լուրջ դերակատարում ունենա, տնօրենի ներկայացրած կադրերին պետք է երաշխավորի: Մինչդեռ Մատենադարանի տնօրենը և գիտխորհրդի նախագահը նույն մարդն են: Սա անտրամաբանական է»:

Շրջանառվող խոսակցություններին այն մասին որ Արծրունի Սահակյանի դուստրը` Էսթեր Սահակյանը, ՀՀ վարչապետի տիկին Աննա Հակոբյանի օգնականն է, և գործուն քայլեր են ձեռնարկվում, որպեսզի Սահակյանն ընտրվի տնօրենի պաշտոնում, վերջինս պատասխանում է. «Ի՞նչ հայր, աղջիկ, Մատենադարանը վեր է ամեն ինչից: Խորհուրդ եմ տալիս ինձ մի քիչ ճանաչել»:

Իսկ հարցին, թե հնարավոր է արդյոք, որ Մատենադարանի երկու թեկնածուներն իրենց համակիրնեով միավորվեն, և դեմ արտահայտվեն դրսի թեկնածուի`Արայիկ Խզմալյանի հնարավոր նշանակմանը, Արծրունի Սահակյանը պատասխանում է. «Կարեն Մաթևոսյանը նախկին տնօրենի հետ համատեղ հաջողությամբ կարողացել են մեկուսացնել ու անտեսել ինձ, նպաստել են հակագիտական մթնոլորտի արմատավորմանը: Եթե ես դառնամ տնօրեն, իրենք կզգան, թե ինչ սխալ են գործել իմ նկատմամբ: Իսկ եթե Արայիկ Խզմալյանը գա տնօրեն, ես կհետևեմ նրա աշխատանքներին, ըստ այդմ կա´մ կօգնեմ, կա´մ ահեղ ձևով կորոտամ»:

Խոսելով Մատենադարանի գիտահետազոտական, զբոսաշրջային մեծ պոտենցիալից` մեր զրուցակիցը նկատում է. «Այցելուները պետք է մեր սալարկած ուղու ստորոտից հերթ կանգնեին մինչև ցուցասրահներ: Մենք դրան պետք է հասնենք:Մատենադարանը կարող է դառնալ տուրիստական ինդուստրիայի բրենդ»:

Մանրամասները՝ տեսանյութում:

Աննա Բաբաջանյան