Վիտալի Բալասանյանի ձերբակալման իրավաչափությունը բողոքարկվել է դատարան

Արցախի ԱԽ նախկին քարտուղար, Արցախի հերոս Վիտալի Բալասանյանի ձերբակալման իրավաչափությունը բողոքարկվել է դատարան։ Այս մասին Factor․am-ի հետ զրույցում ասաց Բալասանյանի փաստաբան Ռաֆայել Մարտիրոսյանը։

Հիշեցնենք, որ Բալասանյանը երեկ է ձերբակալվել՝ Ասկերանի իր տանն իրականացված խուզարկությունից հետո։ Նրան ձերբակալել են ԼՂՀ քրեական օրենսգրքի 337-րդ հոդվածի 1-ին մասով սահմանված արարք կատարելու կասկածանքով, այն է՝ իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ։ Պաշտպանի խոսքով՝ տվյալ դեպքում Բալասանյանին վերագրում են իշխանության ներկայացուցչի նկատմամբ բռնություն գործադրելու սպառնալիք տալու արարք։

Նշենք, որ Ռաֆայել Մարտիրոսյանը երեկ ուշ երեկոյան ահազանգել է այն մասին, որ Բալասանյանի մարմնի վրա բազմաթիվ վնասվածներ են առկա։ Պաշտպանը Factor.am-ին ասաց, որ Բալասանյանը բժշկական հետազոտություն է անցել։ Մարտիրոսյանը հայտնեց նաև, որ Բալասանյանն այս պահին հարուցված քրեական գործով մեղադրյալի կարգավիճակ չունի։

Վիտալի Բալասանյանի ձերբակալման լուրի տարածումից հետո Արցախի դատախազությունը հաղորդագրություն է տարածել մի քրեական գործի մասին, որում շոշափվում է նրա որդու անունը։

ՀՀ գլխավոր դատախազության կոռուպցիոն, սեփականության, տնտեսական գործունեության և պետական ծառայության դեմ ուղղված հանցագործությունների գործերով բաժնում քննարկվել է ԱՀ գյուղի և գյուղատնտեսության աջակցության հիմնադրամի կողմից գլխավոր դատախազություն ներկայացված հաղորդումը, որով պարզվել է, որ ԱՀ գյուղի և գյուղատնտեսության աջակցության հիմնադրամի հոգաբարձուների խորհրդի 14.06.2021թ. որոշմամբ Ասկերան քաղաքի բնակիչ Ա. Բ.-ին նպատակային փոխառության պայմանագրով տրամադրվել է 74.500.000 /յոթանասունչորս միլիոն հինգ հարյուր հազար/ ՀՀ դրամ փոխառություն՝ մեղվաընտանիքներ ձեռք բերելու նպատակով, սակայն փոխառու Ա..Բ.-ի կողմից նպատակային փոխառության պայմանագրով տրամադրված գումարը օգտագործվել է ոչ նպատակային, դրանք չեն ուղղվել պայմանագրի պարտադիր պայման հանդիսացող մեղվաընտանիքների ձեռք բերմանը, ինչի հետևանքով պետությանը պատճառվել է խոշոր վնաս։Նկատի ունենալով, որ նյութերում առերևույթ առկա են ԱՀ քրեական օրենսգրքի 199-րդ հոդվածի 1-ին մասով /Վարկը ոչ նպատակային օգտագործելը/ նախատեսված հանցագործության հատկանիշներ՝ 12.07.2023թ. հարուցվել է քրեական գործ: Գործի մինչդատական քրեական վարույթի օրինականության նկատմամբ հսկողությունը և դատավարական ղեկավարումն իրականացնում է ԱՀ գլխավոր դատախազության կոռուպցիոն, սեփականության, տնտեսական գործունեության և պետական ծառայության դեմ ուղղված հանցագործությունների գործերով բաժինը»,- հայտնել է ԱՀ դատախազությունը։

Ռաֆայել Մարտիրոսյանը մեզ հետ զրույցում ասաց, որ Բալասանյանի որդին ևս ձերբակալված է եղել, սակայն այժմ ազատության մեջ է, նա նույնպես մեղադրյալի կարգավիճակ չունի։

Արաքս Մամուլյան