03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Համաձայնագրի հասանելիությունը ներառում է կողմերի փոխզիջումների պատրաստակամությունը․ Պետդեպի խոսնակը՝ ՀՀ-Ադրբեջան բանակցությունների մասին
Քաղաքականություն
13.07.2023 | 11:40
Մոտ ապագայում Հայաստանի և Ադրբեջանի ԱԳ նախարարների միջև որևէ նախատեսված հանդիպում չկա։ Այս մասին հայտնել է ԱՄՆ արտաքին քաղաքական գերատեսչության լրատվական ծառայության ղեկավար Մեթյու Միլլերը։
Լրագրողի հարցին՝ ի՞նչ է նշանակում «հասանելիության սահմաններում խաղաղություն» ձևակերպումը հայ-ադրբեջանական բանակցությունների համատեքստում, ի՞նչ նկատի ունի, երբ ասում է՝ հասանելիության սահմաններում, հնարավո՞ր է, արդյոք, ժամկետ նշել՝ «մեկ ամիս, երկու ամիս, հինգ ամիս», Միլլերը պատասխանել է, որ չի ցանկանում դրա համար որևէ ժամկետ սահմանել։
«Երբ մենք ասում ենք, որ այն հասանելի է, նկատի ունենք, որ նրանք զգալի առաջընթաց են գրանցել մի շարք խնդիրների հարցում։ Անգամ վերջին հանդիպմանը նրանք նեղացրել են չլուծված խնդիրների շրջանակը։ Մենք կարծում ենք, որ չլուծված խնդիրների կրճատումով համաձայնագիրը հասանելի կլինի, բայց դա, անկասկած, ներառում է նաև երկու կողմերի փոխզիջումների պատրաստակամությունը»,- հայտարարել է Միլլերը։
Հունիսի վերջին ԱՄՆ պետքարտուղար Էնթոնի Բլինքենի միջնորդությամբ Վաշինգտոնում անցկացված Հայաստանի և Ադրբեջանի արտգործնախարարներ Արարատ Միրզոյանի և Ջեյհուն Բայրամովի բանակցությունների ավարտին միասնական հաղորդագրություն է տարածվել, ըստ որի՝ կողմերը համաձայնեցրել են համաձայնագրի նախագծի ևս մի քանի հոդված և «գրանցել փոխըմբռնման առաջընթաց»:
Տաթև Ֆռանգյան
