15.09.2026 | 14:26
Փետրվարի 8-ից «խվատայկաները» կհամարվեն շահումով խաղ․ ՊԵԿ
100-ամյա հայ կինոյի դռները բացելու բանալին՝ GIF-երով․ ոսկեծիրանյան «Անցուդարձ»․ ՏԵՍԱՆՅՈՒԹ
Մշակույթ
12.07.2023 | 21:55
Երևանի «Ոսկե ծիրան» միջազգային կինոփառատոնը, Գաֆէսճեան արվեստի կենտրոնը և Հայաստանի ազգային կինոկենտրոնը ներկայացնում են կինոօպերատոր Արեգ Կոզմոյանի «Անցուդարձ, հարյուրամյա գիֆապատում» փորձարարական ցուցադրությունը՝ նվիրված հայ կինոյի 100-ամյակին։
Արեգ Կոզմոյանը գտել է հարյուրամյա հայ կինոյի դռները բացելու իր բանալին՝ GIF-ը, որը համացանցում և ժամանակակից սոցիալական ցանցերում բավական մեծ տարածում ունի՝ լինելով պարզ, մատչելի ու հասանելի միջազգային վիզուալ լեզու։
«Այս ցուցահանդեսը ներառում է մեր կինոյի ողջ պատմությունը՝ մինչև մեր օրեր։ Դուք կարող եք տեսնել 10 պրոեկցիա, որոնցից ամեն մեկը մի տասնամյակին է վերաբերում։ Ցուցահանդեսում ներառված են ֆիլմեր 1920-ականներից սկսած մինչև մեր օրերը»,- ասում է Արեգ Կոզմոյանը։
«Անցուդարձ» նախագիծը հայ կինոյի 100-ամյակի շտեմարան է՝ տասը տասնամյակից ընտրված հարյուր ֆիլմերի գիֆերով։ Յուրաքանչյուր դրվագ դնելով հետուառաջ շարժման մեջ՝ օպերատորը ստանում է պատկերների չընդհատվող շրջապտույտ։
«Հինը սովորաբար ասոցացվում է ծանր, ոչ հրապուրիչ մի բանի հետ, իսկ այս ցուցադրությունը փորձ է՝ ցույց տալու, որ ժառանգության հետ տարբեր տեսակի առնչություն կարելի է ստեղծել»,- նկատում է «Ոսկե ծիրանի» գեղարվեստական տնօրեն Կարեն Ավետիսյանը։
Ցուցադրությունը, Վան Սարկիսյանի հուզական երաժշտական մշակումների ու Ռոդիոն Նիկիտինսկիխու ձայնային համադրությամբ, հանդիսատեսին ուղեկցում է հարյուրամյա հայ կինոյի արահետներով։
Գաֆէսճեան արվեստի կենտրոնի ցուցադրությունների գծով տնօրեն Արմեն Եսայանցը նկատում է՝ թանգարանային միջավայրը կարող է չբավարարել կինոարվեստի բոլոր շերտերը միաժամանակ բացահայտելու համար։ Այդուհանդերձ, իրենք արել են հնարավորը, որպեսզի դա իրականություն դառնա։
Մանրամասները՝ տեսանյութում։
Աննա Բաբաջանյան
