Թագուհի Թովմասյանին պատժում են ընդդիմադիր գործունեության համար, ՔՊ-ն իշխանազավթ է. Մինասյան․ ՏԵՍԱՆՅՈՒԹ

«Սա ՔՊ-ի հերթական հակաքաղաքական, հակասահմանադրական ապօրինություն է»,- Ազգային ժողովում, լրագրողների հետ զրույցում նշեց «Հայաստան» խմբակցության քարտուղար Արծվիկ Մինասյանը` անդրադառնալով Թագուհի Թովմասյանին մարդու իրավունքների պաշտպանության հանձնաժողովի նախագահի պաշտոնից զրկելու վերաբերյալ ՔՊ նախագծին։

«ՔՊ-ն անում իր քաղաքական մեծամասնության ուժով իրեն ոչ ցանկալի, այլ մոտեցումներ ունեցող ընդդիմադիրներին զրկել Սահմանադրությամբ երաշխավորված լծակներից:

Սա իշխող ուժի իշխանազավթման հետևողական քայլերից մեկն է։ Այն, ինչ իրենք հիմա անում են (ընդդիմության ներկայացուցչին մարդու իրավունքների պաշտպանության հանձնաժողովի նախագահի պաշտոնից զրկելու նախագիծ են ներկայացնում), ցույց է տալիս, որ էս մարդիկ երբ հայտարարում էին խոսքի ազատության, ընդդիմության դերի մասին, սին էին. իրենք իրականացնում են պարզագույն իշխանազավթում: Իրենք ցանկանում են զսպաշապիկ հագցնել ընդդիմությանը, ստիպել խաղալ իրենց խաղը»,- նշեց Մինասյանը։

Պատգամավորի խոսքով՝ ընդդիմությունը նոր թեկնածուի չի առաջադրելու, և եթե անգամ իշխանությունն էլ չառաջադրի, միևնույն է նախագահի լիազորություններն անցնելու է իշխանության ներկայացուցչին․ «Սահմանդրությունն ասում է, որ խմբակցությունն է որոշում՝ ում նշանակել իրեն լիազորված պաշտոնում, ինչն էլ հակասում է կանոնակարգ օրենքին, դրա համար մենք ՍԴ դիմում ենք ներկայացրել։ Իրենք եթե թեկնածու չառաջադրեն, միևնույն է, լիազորությունները կանցնեն ՔՊ-ական փոխնախագահին։ Ըննդիմությանը հասանելի բոլոր երեք հանձնաժողովի նախագահությունները զավթել են իշխանականները»,- նշեց Մինասյանը։

Ընդդիմադիր պատգամավորն անհիմն է համարում Թագուհի Թովմասյանին պաշտոնից զրկելու համար բերված բոլոր հիմնավորումները։

Մանրամասները՝ տեսանյութում։