Քաղաքականություն
10.07.2023 | 23:48
ՆԱՏՕ-ի գլխավոր քարտուղար Յենս Ստոլտենբերգը Թուքիայի նախագահ Ռեջեփ Թայիփ Էրդողանի և Շվեդիայի վարչապետ Ուլֆ Քրիստերսսոնի հետ հանդիպումից հետո տեղեկացրել է, որ Էրդողանը համաձայնվել է Հյուսիսատլանտյան դաշինքին Շվեդիայի անդամակցությանը։
«Ուրախ եմ տեղեկացնել, որ Ռեջեփ Թայիփ Էրդողանի և Ուլֆ Քրիստերսսոնի հետ հանդիպման արդյունքում նախագահ Էրդողանը համաձայնել է շուտափույթ փոխանցել Շվեդիայի անդամակցության արձանագրությունը Թուրքիայի Մեծ Ազգային ժողով և ապահովել վավերացումը։ Սա պատմական քայլ է, որն ավելի ուժեղ և անվտանգ է դարձնում ՆԱՏՕ-ի բոլոր դաշնակիցներին»,- հայտնել է Հյուսիսատլանտյան դաշինքի գլխավոր քարտուղարը։
Ռուս-ուկրաինական պատերազմի բռնկումից հետո Շվեդիան և Ֆինլանդիան ցանկություն հայտնեցին հրաժարվել չեզոք կարգավիճակից և միանալ ՆԱՏՕ-ին։ Սակայն Թուրքիան նախապայմաններ առաջադրեց այս երկրների անդամակցության դիմաց։ Տեղի ունեցան բազմաթիվ քննարկումներ, Արևմուտքի երկրների լիդերները, գերազանցապես՝ Միացյալ Նահանգները, առանձնահատուկ ջանքեր գործադրեցին Սկանդինավյան երկու երկրների անդամակցության հարցով։ Եթե Ֆինլանդիան ապահովեց Թուրքիայի պահանջների կատարումը, և ամիսներ առաջ անդամակցեց դաշինքին, ապա Շվեդիայի դեպքում տևական ժամանակ չէր հաջողվում համաձայնության գալ։ Եվ ահա, Ուկրաինայի հարցով ՆԱՏՕ-ի ղեկավարների հանդիպման նախաշեմին Թուրքիան համաձայնվեց Շվեդիայի անդամակցությանը։
Հետաքրքիր է, որ Պուտինի հետ առանձնահատուկ ջերմ հարաբերություններ ունեցող Էրդողանը ոչ միայն այսպիսով նպաստեց ՆԱՏՕ-ի ընդլայնմանը դեպի Ռուսաստանի սահմաններ, այլև օրերս Էրդողանը հայտարարեց, որ կողմ է նաև ՆԱՏՕ-ին Ուկրաինայի անդամակցության հեռանկարին։ Ավելին, Թուրքիայի նախագահը Ուկրաինայի նախագահ Վոլոդիմիր Զելենսկիի հետ հանդիպման արդյունքում համաձայնեց Ուկրաինային վերադարձնել Մարիուպոլի պաշտպանությանը մասնակցած Ազովի զորամիավորման հրամանատարներին՝ խախտելով Պուտինի հետ պայմանավորվածությունը։
