14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Թուրքիան վերածվում է ոչ բարեկամ երկրի․ ռուս սենատոր
Քաղաքականություն
10.07.2023 | 15:45
Թուրքական իշխանությունների կողմից Ուկրաինային «Ազով» գումարտակի հրամանատարների փոխանցումը վկայում է, որ Թուրքիան չեզոք երկրից վերածվում է ոչ բարեկամ պետության։ Այս մասին հայտարարել է Դաշնային խորհրդի պաշտպանության և անվտանգության հանձնաժողովի ղեկավար Վիկտոր Բոնդարևը։ Նա Անկարայի որոշումն անվանել է «սադրիչ», գրում է Կոմերսանտը։
«Թուրքական իշխանությունները Կիևին են հանձնել «Ազով»-ի ղեկավարներին, որոնք պետք է Թուրքիայում փաստացի տնային կալանքի տակ լինեին մինչև հատուկ ռազմական գործողության ավարտը։ Թուրքիան միտումնավոր անտեսել է դա և հանդես եկել Ուկրաինային արագացված կարգով ՆԱՏՕ ընդունելու և Ուկրաինայում անօդաչուների գործարանի կառուցման օգտին»,- ասել է սենատորը։
Նա նշել է, որ դաշինքի ճնշումը, ինչպես նաև հացահատիկային գործարքի փաստացի դադարեցումն այդ քայլի հիմք են դարձել։ Բոնդարևը համոզված է, որ «նույնիսկ հավաքական Արևմուտքի մեծ ճնշման ներքո կարելի է փրկել սեփական դեմքը» և որպես օրինակ նշել Հունգարիայի վարչապետ Վիկտոր Օրբանին։
«Ռուսական կողմը երկար է համբերում, սակայն հասկանում է, թե ովքեր են իրական թշնամիներն ու ընկերները։ Մեզ Թուրքիայի հետ կապում են բազմաթիվ քաղաքական շահերը, ակնհայտ է, որ ԵՄ-ն Թուրքիային չեն վերցնի, իսկ ՆԱՏՕ-ին այն պետք է Սևծովյան նեղուցները վերահսկելու և Մերձավոր Արևելքն ապակայունացնելու համար»,- հայտարարել է ռուս սենատորը։
Նա Թուրքիային կոչ է արել «մտածել ՆԱՏՕ-ից դուրս գալու և Ռուսաստանի հետ դաշինքի մասին»։ Ըստ գործչի՝ դա փոխադարձ շահավետ է։
Հուլիսի 8-ին Ուկրաինայի նախագահ Վլադիմիր Զելենսկին Թուրքիա աշխատանքային այցից հետո հայտարարել էր «Ազովի» հինգ հրամանատարների վերադարձի մասին։ Նրանք Թուրքիա էին տեղափոխվել ռուսական գերությունից՝ 2022 թվականի սեպտեմբերին Ուկրաինայի հետ փոխանակման արդյունքում և, ըստ պայմանավորվածության, պետք է այնտեղ մնային մինչև պատերազմի ավարտը։ ՌԴ նախագահի մամուլի խոսնակ Դմիտրի Պեսկովն այդ քայլն անվանել էր պայմանավորվածությունների խախտում և նշել, որ Ռուսաստանի իշխանություններին չեն զգուշացրել նրանց փոխանցման մասին։
Էմմա Չոբանյան
