14.08.2026 | 12:41
Լենինգրադի մարզը զանգվածային հարձակման է ենթարկվել․ Ուստ-Լուգայի նավահանգստում հրդեհ է բռնկվել
Պարույր Հովհաննիսյանն ընդունել է Եվրոպայի խորհրդի բարձրաստիճան պատվիրակությանը
Քաղաքականություն
07.07.2023 | 17:37
Հուլիսի 6-ին ՀՀ ԱԳ նախարարի տեղակալ Պարույր Հովհաննիսյանն ընդունել է Եվրոպայի խորհրդի մարդու իրավունքների և իրավունքի գերակայության հարցերով գլխավոր տնօրեն Խրիստոս Յակումոպուլոսին և քաղաքական ու արտաքին հարաբերությունների հարցերով տնօրեն Միրոսլավ Պապային․ տեղեկացնում են ՀՀ ԱԳՆ-ից։
ԱԳ նախարարի տեղակալը ներկայացրել է Ադրբեջանի կողմից Լաչինի միջանցքի ապօրինի արգելափակման հետևանքով Լեռնային Ղարաբաղի ժողովրդի դեմ ծառացած հումանիտար մարտահրավերները, ինչպես նաև մարդու իրավունքների սահմանափակումները: Այս համատեքստում զրուցակիցներն անդրադարձել են Եվրոպայի խորհրդի հնարավոր դերակատարությանը՝ հաշվի առնելով վերջինիս մանդատը և գործունեության շրջանակը և կարևորել ԵԽԽՎ կողմից վերջերս ընդունված «Լաչինի միջանցքով ազատ և անվտանգ մուտքի ապահովում» խորագրով բանաձևը։
Պարույր Հովհաննիսյանը ներկայացրել է Հայաստան-Ադրբեջան հարաբերությունների կարգավորման գործընթացի վերջին զարգացումները և ԼՂ ժողովրդի իրավունքների ու անվտանգության երաշխիքների հասցեագրմանն առնչվող խնդիրները:
Հանդիպմանը քննարկվել են նաև Հայաստան-ԵԽ գործընկերության օրակարգի մի շարք հարցեր։
Տեղեկատվություն
Բարձրաստիճան պատվիրակությունը Հայաստան է այցելել Եվրոպայի խորհրդի գլխավոր քարտուղարի նախաձեռնությամբ՝ տեղում տարածաշրջանային գործընթացներին ծանոթանալու և հետագա անելիքները մշակելու նպատակով։
Պաշտոնական հանդիպումներից բացի պատվիրակությունն այցելել է Սյունիքի մարզ, որտեղ հանդիպումներ է ունեցել մարզպետ Ռոբերտ Ղուկասյանի, ԵՄ առաքելության ղեկավարի ժամանակավոր պաշտոնակատար Էրիկ Դիկումեի, ինչպես նաև Լաչինի միջանցքի արգելափակման հետևանքով Հայաստանում մնացած Լեռնային Ղարաբաղի բնակիչների հետ: Պատվիրակությունն այցելել է նաև Կոռնիձոր և Լաչինի միջանցքի սկզբնամաս:
