Ֆրանսիան մոբիլիզացվել է այն արդար խաղաղության համար, որը հարգում է միջազգային իրավունքը․ Ֆրանսիայի ԱԳ նախարարը Սյունիքից լուսանկար է հրապարակել

Ֆրանսիան մոբիլիզացվել է այն արդար խաղաղության համար, որը հարգում է միջազգային իրավունքը․ թվիթերի իր էջում գրել է Ֆրանսիայի Արտաքին գործերի նախարար Կատրին Կոլոննան՝ գրությանը կից Սյունյաց բնապատկերից լուսանկար հրապարակելով։

«Ես ՀՀ ԱԳ նախարար Արարատ Միրզոյանին փոխանցել եմ, որ Ֆրանսիան աջակցում է Հայաստանի՝  Ադրբեջանի հետ բանակցությունների միջոցով խաղաղության հասնելուն ուղղված ջանքերին և Լեռնային Ղարաբաղում բնակվող հայերի իրավունքները պաշտպանությանը»,- գրել է Կոլոնան։

Հիշեցնենք, որ ՀՀ ԱԳՆ-ն երեկ երեկոյան հաղորդագրություն էր տարածել, ըստ որի՝ Արարատ Միրզոյանը հեռախոսազրույց է ունեցել Ֆրանսիայի ԱԳ նախարար Կատրին Կոլոննայի հետ։ Զրուցակիցները մտքեր են փոխանակել տարածաշրջանում անվտանգության և կայունության հարցերի շուրջ:

Արարատ Միրզոյանը ֆրանսիացի գործընկերոջն է ներկայացրել Հայաստան-Ադրբեջան հարաբերությունների կարգավորման գործընթացի վերջին զարգացումները: Անդրադարձ է կատարվել առանցքային հարցերին, մասնավորապես Հայաստանի և Ադրբեջանի միջև պետական սահմանի սահմանազատման, Լեռնային Ղարաբաղի ժողովրդի իրավունքների և անվտանգության հարցերի՝ միջազգային մեխանիզմի ներքո հասցեագրման, ինչպես նաև տարածաշրջանում տնտեսական ու տրանսպորտային կապուղիների ապաշրջափակմանն առնչվող հարցերի: Նախարար Միրզոյանն ընդգծել է ուժի կամ ուժի սպառնալիքի կիրառման միջոցով խնդիրները լուծելու անթույլատրելիությունը, Ադրբեջանի կողմից ագրեսիվ գործողություններից և սադրիչ հռետորաբանությունից զերծ մնալու անհրաժեշտությունը:

Ընդգծվել է Լաչինի միջանցքի ապօրինի արգելափակման հետևանքով Լեռնային Ղարաբաղում ստեղծված մարդասիրական ճգնաժամի հաղթահարման և Ադրբեջանի կողմից էթնիկ զտումներին ուղղված հետագա գործողությունների կանխման ուղղությամբ միջազգային ջանքերի հրատապությունը: