Քաղաքականություն
06.07.2023 | 15:47Հումանիտար իրավիճակը Լեռնային Ղարաբաղում վատթարանում է։ Այս մասին ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նա նաև նշել է, որ Ռուսաստանն իր ծայրահեղ մտահոգությունն է հայտնում Լեռնային Ղարաբաղում հրադադարի խախտման դեպքերի աճի կապակցությամբ։
«Մենք ծայրահեղ մտահոգություն ենք հայտնում Լեռնային Ղարաբաղում հրադադարի խախտման դեպքերի աճի և Լաչինի միջանցքի շարունակվող շրջափակման կապակցությամբ: Առկա տեղեկատվության համաձայն՝ հումանիտար իրավիճակը տարածաշրջանում վատթարանում է: Ցավով պետք է արձանագրենք, որ մատակարարումների կրճատման հետևանքով Ղարաբաղի բնակչությունը կարող է մնալ առանց սննդի, առաջին անհրաժեշտության ապրանքների և դեղամիջոցների պաշարների»,- ասել է Զախարովան։
Ռուսաստանցի պաշտոնյան նաև Լաչինի միջանցքը բացելու կոչով է դիմել Բաքվին։
«Մենք կոչ ենք անում Բաքվին և Երևանին բոլոր հարցերը լուծել բացառապես քաղաքական և դիվանագիտական ճանապարհով: Կոչ ենք անում ադրբեջանական կողմին՝ ապաշրջափակել Լաչինի միջանցքը, ապահովել քաղաքացիների, տրանսպորտային միջոցների և բեռների անարգել տեղաշարժը»,- հայտարարել է Զախարովան։
Նրա խոսքով՝ Ռուսաստանը կապ է պահպանում հայկական և ադրբեջանական կողմերի հետ՝ տարածաշրջանում իրավիճակն ապաէսկալացնելու նպատակով։ Այդ շփումները, ըստ Զախարովայի, շարունակվում են ինչպես քաղաքական մակարդակով, այնպես էլ խաղաղապահ զորախմբի միջոցով։
Մանրամասները՝ տեսանյութում:
Տաթև Ֆռանգյան
