06.06.2026 | 10:42
«Պիտի մինիմում մե 10 ձեն բերե». ՀԿԿ-ն նոր գաղտնալսում է հրապարակել
ԱՀԿ-ն կոչ է անում կանխել բնապահպանական ռիսկերի պատճառով ավելի քան 1,5 միլիոն մարդու մահը
Քաղաքականություն
06.07.2023 | 23:30
Առողջապահության համաշխարհային կազմակերպության (ԱՀԿ)՝ եվրոպական տարածաշրջանի 53 երկրներում ամեն տարի ավելի քան 1,4 միլիոն մարդ է մահանում շրջակա միջավայրի վտանգների կանխարգելելի ազդեցությունից, գրում է Euronews-ը:
Նշվում է, որ Բուդապեշտում անցկացվում է շրջակա միջավայրի և առողջության հարցերով ԱՀԿ նախարարական համաժողովը: Հուլիսի 7-ին տարածաշրջանի երկրների նախարարներն ու ներկայացուցիչները կստորագրեն կոնկրետ գործողությունների հռչակագիր, որում պարտավորվում են հրատապ քայլեր ձեռնարկել այդ կորուստները նվազեցնելու համար։
«Ամեն տարի ավելի քան մեկ միլիոն մահերի կանխարգելումը, որոնք վերագրվում են շրջակա միջավայրի ռիսկի գործոններին, իրատեսական նպատակ է: Մենք գիտենք, թե դա ինչ է պահանջում, և հիմա ժամանակն է խոսքից գործի անցնելու: Յուրաքանչյուր ոք ունի մաքուր, առողջ և կայուն բնապահպանական պայմանների իրավունք։ Կլիմայի փոփոխության, աղտոտման և կենսաբազմազանության կորստի էկոլոգիական ճգնաժամը սպառնում է մեր մոլորակին և մեր գոյությանը: Բուդապեշտի հռչակագիրն առաջարկում է կոնկրետ գործողություններ՝ բարելավելու այն միջավայրը, որտեղ մարդիկ ապրում են, նվազեցնել հիվանդությունների բեռը, առողջապահական անհավասարությունը, առողջապահական համակարգերի բեռը և ամրապնդել մեր հավաքական դիմադրողականությունը նոր համաճարակների դեմ»,- ասել է ԱՀԿ եվրոպական տարածաշրջանային տնօրեն Հանս Կլյուգեն։
Ըստ մասնագետների՝ 2019 թվականին մոտ 570 հազար մահ կարող էր կապված լինել օդի աղտոտվածության հետ, ավելի քան 150 հազարը՝ բնակելի տարածքների օդի աղտոտվածության հետ։ 2020 թվականին մոտ 77 միլիոն մարդ չի ունեցել անվտանգ խմելու ջուր։
Բուդապեշտի հռչակագիրը հաստատման կներկայացվի Եվրոպայի տարածաշրջանային կոմիտեի 73-րդ նստաշրջանին, որը տեղի կունենա Ղազախստանի մայրաքաղաք Աստանայում 2023 թվականի հոկտեմբերի 24-26-ը։
Տաթև Ֆռանգյան
