Քաղաքականություն
06.07.2023 | 13:59
Իրանի ԱԳ նախարար Հոսեյն Ամիր Աբդոլահիանը նախօրեին Բաքվում լրագրողների հետ զրույցում հայտարարել է, որ երկու երկրները պայմանավորվել են արագացնել, այսպես կոչված, Հարավային Արազի միջանցքի գործարկումը։ Նրա խոսքով՝ նման հրաման կա Իրանի նախագահի կողմից։
«Դա լուրջ խթան կհանդիսանա իրանա-ադրբեջանական հարաբերությունների զարգացմանը, հատկապես հաղորդակցության ոլորտում: Կարելի է ասել, որ այդ միջանցքը կարևոր դերակատարում կունենա Ադրբեջանի հիմնական մասն ու Նախիջևանը կապելու գործում։ Մենք շատ լայն քննարկումներ ենք ունեցել նախագահ Իլհամ Ալիևի հետ տարածաշրջանում հաղորդակցությունների բացման շուրջ»,- ասել է Աբդոլահիանը։
Հավելենք, որ խոսքն Իրանի տարածքով Ադրբեջանից դեպի Նախիջևան ավտոմոբիլային ու երկաթուղային ուղիների կառուցման մասին է։
Հիշեցնենք՝ 2022 թվականի մարտին Ադրբեջանի և Իրանի կառավարությունները փոխըմբռնման հուշագիր էին ստորագրել այս հաղորդակցային ուղու վերաբերյալ։ Վերջին ամիսներին երկու երկրների լարված հարաբերությունների պայմաններում այս ծրագրի իրականացումը դադարեցվել է։
Ի դեպ, Իրանի ԱԳ նախարարը նախօրեին Բաքվում մասնակցում էր Չմիավորման շարժման համակարգող բյուրոյի նախարարական հանդիպմանը։
Էմմա Չոբանյան
