Հասարակություն
05.07.2023 | 09:55
«Սասնա Ծռեր» խմբավորման անդամ, ՊՊԾ գնդի գրավման գործով ազատազրկված Վարուժան Ավետիսյանի որդու՝ Դավիթ Ավետիսյանի խափանման միջոցն ընտրվել է ստորագրություն չհեռանալու մասին. քիչ առաջ նա ազատ արձակվեց։ Նա ձերբակալված էր ավելի քան 65 ժամ։ Ինչպես Factor.am-ի հետ զրույցում նշեց փաստաբան Արայիկ Պապիկյանը՝ Դավիթի նկատմամբ երեկ հանրային քրեական հետապնդում է հարուցվել.
«Վարչապետին «վիժվածք» և «դավաճան» կոչելը դիտվել է որպես վիրավորանք և Դավիթին խուլիգանության հոդվածով մեղադրանք առաջադրվել։ Մեզ երեք փաստաթուղթ են տվել՝ ձերբակալման, ազատ արձակման և հանրային քրեական հետապնդում հարուցելու մասին, բոլորում նկարագրված դեպքն ու բառերը տարբեր էին այն դեպքում, երբ միայն մեկ ոստիկան է ցուցմունք տվել»,- նշեց Պապիկյանը։
Հիշեցնենք՝ հուլիսի 2-ին 16:00-ի սահմաններում Անգլիական այգում Դավիթ Ավետիսյանը հանդիպել է Նիկոլ Փաշինյանին և նրա ուղղությամբ բացականչել՝ «պատասխան ես տալու իմ զոհված եղբայրների համար»։ Արայիկ Պապիկյանի խոսքով՝ վայրկյաններ անց ոստիկանները տղային բիրտ ուժով պառկեցրել են գետնին՝ փակելով շնչուղիները, այդ ժամանակ Դավիթն արտաբերել է «դավաճան, վիժվածք» բառերը.
«Մոտ կանգնած մարդիկ ասել են, որ տղան Վարուժան Ավետիսյանի որդին է։ Ոստիկանների մի մասը, որոնք ավելի ուժեղ էին սեղմում Դավիթին, հեռացել են, իսկ մնացածը բերման են ենթարկել տղային Կենտրոնի ոստիկանական բաժին»,- Factor.am-ին մանրամասնել էր Արայիկ Պապիկյանը։ Մեր հարցին՝ բացականչություններին որևէ արձագանք տվե՞լ է վարչապետը՝ Պապիկյանը բացասական պատասխան տվեց։
Փաստաբանի փոխանցմամբ՝ ինքն անմիջապես գնացել է բաժին, սակայն իրեն ու Դավիթ Ավետիսյանին քննիչն ընդունել է ավելի քան 5 ու կես ժամ անց՝ 21:45-ին.
«Մտել ենք քննիչի մոտ, բարևել ենք ու միանգամից ձերբակալման որոշում են մեզ ներկանացրել։ Այսինքն, որոշումն արդեն իսկ կայացված է եղել, առանց Դավիթին լսելու, նրանից ցուցմունք վերցնելու, առանց քննչական որևէ գործողություն իրականացնելու։ Սա աբսուրդ է։ Ավելի աբսուրդ է առաջադրված մեղադրանքը. վիրավորական բառ օգտագործելու համար Դավիթին առաջադրել են ոչ թե վիրավորանքի, այլ խուլիգանության մասով մեղադրանք»։
Ռոզա Վարդանյան
