Մենք քննարկում ենք, թե Հայաստանին լրացուցիչ ինչ կարող է անհրաժեշտ լինել․ Քրիստինա Քվին

Միացյալ Նահանգները կողմ չէ անդրսահմանային հրաձգությանը, որը կարող է վտանգել որևէ քաղաքացիական անձի:  Այս մասին Հանրային հեռուստաընկերության եթերում հայտարարեց է ՀՀ-ում ԱՄՆ արտակարգ և լիազոր դեսպան Քրիստինա Քվինը: Դեսպանը նշեց, որ իրենք կոչ են անում, որ զորքերը հայելաձև երկու կողմերից հետ քաշվեն, որպեսզի նվազի նման միջադեպերի հավանականությունը:

Անդրադառնալով դիտարկմանը, որ կայուն բանակցությունների համար, գուցե, անհրաժեշտ է կարգավորել Հայաստանի անվտանգային բալանսը, և այն հարցին, արդյո՞ք Միացյալ Նահանգները տեսնում է պոտենցիալ անվտանգային հարցում օգնելու, դեսպանը պատասխանեց․ «․․․Մենք ունենք անվտանգության ոլորտում հարաբերություններ Հայաստանի հետ: Մենք արդեն Հայաստանի դիմումի համաձայն անում ենք բաներ, որոնցով օգնում ենք Հայաստանին՝ անվտանգության ոլորտում. օրինակ՝ մենք արդեն տևական ժամանակ է, ինչ բարձր ենք գնահատում Հայաստանի մասնակցությունը համաշխարհային խաղաղապահ ջանքերին: Մենք բազամաթիվ վարժանքներ և այլ աշխատանքներ ենք տարել Հայաստանի հետ, որոնց միջոցով օգնում ենք խաղաղապահ առաքելություններին՝ Հայաստանի մասնակցությունը:

Հայաստանի դիմումի համաձայն՝ մենք նաև ռազմաբժշկական տեխնիկական միջոցներ ենք տրամադրել: Մենք նաև փոխանակման ծրագրեր ունենք հայկական բանակի մասնագետների հետ. նրանք գալիս են ԱՄՆ և տեսնում են, թե ինչպես ենք մենք գործում, այսպիսով՝ մենք անվտանգության ոլորտում արդեն իսկ ունենք հարաբերություններ Հայաստանի հետ: Մենք քննարկում ենք, թե Հայաստանին լրացուցիչ ինչ կարող է անհրաժեշտ լինել»: