Իրանը հայտնել է, որ ավարտել է Թեհրանում Ադրբեջանի դեսպանատան վրա զինված հարձակման գործի քննությունը

Իրանի դատական իշխանության խոսնակ Մասուդ Սաթայշին այսօրվա մամուլի ասուլիսում անդրադարձել է Թեհրանում Ադրբեջանի դեսպանատան վրա զինված հարձակման գործին, գրում է Mehr գործակալությունը։

«Ցավոք, Ադրբեջանի դեսպանատան վրա հարձակումը խախտել է դիվանագիտական իրավունքները և խաթարել հարաբերությունները երկու բարեկամ և հարևան երկրների միջև։ Երկրի քաղաքական և դատական ​​անվտանգության մարմինները մշտապես ընդգծել են, որ այս հարձակման գլխավոր հեղինակի կամ դրանում դերակատարություն ունեցած ցանկացած այլ անձի նկատմամբ պետք է կոշտ վերաբերմունք ցուցաբերվի»,- ասել է նա։

Պաշտոնյան նշել է, որ գործի քննությունն ավարտվել է։

«Այս գործի շրջանակն այժմ պարզվել է, նախաքննությունն ավարտվել է, և նույն անձն այս գործով մեղադրվում է։ Մենք ակնկալում ենք, որ գործը կլուծվի Ադրբեջանի դատական համակարգի հետ համագործակցությամբ»,- նշել է Սաթայշին։

Հիշեցնենք, որ հունվարի 27-ին Իրանում Ադրբեջանի դեսպանատան վրա հարձակման հետևանքով 1 մարդ զոհվել էր, երկուսը՝ վիրավորվել։ Հարձակվողը ձերբակալվել էր։ Պաշտոնական Բաքուն դեսպանատան վրա իրականացված հարձակումն «ահաբեկչություն» էր որակել։ Միջադեպի վերաբերյալ Թեհրանի քրեական դատախազի պաշտոնակատարն ասել էր, որ զինված անձը Թեհրանում Ադրբեջանի դեսպանատան վրա հարձակվել է անձնական դրդապատճառներով։ Դրանից հետո Բաքուն տարհանել էր Թեհրանում Ադրբեջանի դեսպանատան աշխատակիցներին․ այս պահին դեսպանատան գործունեությունը դադարեցված է։

Այս դեպքից հետո երկու երկու երկրների հարաբերությունները կտրուկ վատթարացել են։

Էմմա Չոբանյան