«Պատասխա՛ն ես տալու». Վարուժան Ավետիսյանի որդին Փաշինյանին վիրավորելու համար երեկվանից ձերբակալված է

«Սասնա Ծռեր» խմբավորման անդամ, ՊՊԾ գնդի գրավման գործով ազատազրկված Վարուժան Ավետիսյանի որդին՝ Դավիթը, երեկ վարչապետ Նիկոլ Փաշինյանի հետ կապված միջադեպով բերման է ենթարկվել, ապա՝ ձերբակալվել։ Այս մասին Factor.am-ի հետ զրույցում հայտնեց փաստաբան Արայիկ Պապիկյանը.

«Երեկ 16:00-ի սահմաններում Անգլիական այգում Դավիթը հանդիպել է Նիկոլ Փաշինյանին և նրա ուղղությամբ բացականչել՝ «պատասխան ես տալու իմ զոհված եղբայրների համար»։ Վայրկյաններ անց ոստիկանները նրան բիրտ ուժով պառկեցրել են գետնին՝ փակելով շնչուղիները, այդ ժամանակ Դավիթն արտաբերել է «դավաճան, վիժվածք» բառերը։ Այդ ժամանակ մոտ կանգնած մարդիկ ասել են, որ տղան Վարուժան Ավետիսյանի որդին է։ Ոստիկանների մի մասը, որոնք ավելի ուժեղ էին սեղմում Դավիթին, հեռացել են, իսկ մնացածը բերման են ենթարկել տղային Կենտրոնի ոստիկանական բաժին»,- Factor.am-ին մանրամասնեց Արայիկ Պապիկյանը։ Մեր հարցին՝ բացականչություններին որևէ արձագանք տվե՞լ է վարչապետը՝ Պապիկյանը բացասական պատասխան տվեց։

Փաստաբանի փոխանցմամբ՝ ինքն անմիջապես գնացել է բաժին, սակայն իրեն ու Դավիթ Ավետիսյանին քննիչն ընդունել է ավելի քան 5 ու կես ժամ անց՝ 21:45-ին.

«Մտել ենք քննիչի մոտ, բարևել ենք ու միանգամից ձերբակալման որոշում են մեզ ներկանացրել։ Այսինքն, որոշումն արդեն իսկ կայացված է եղել, առանց Դավիթին լսելու, նրանից ցուցմունք վերցնելու, առանց քննչական որևէ գործողություն իրականացնելու։ Սա աբսուրդ է։ Ավելի աբսուրդ է առաջադրված մեղադրանքը. վիրավորական բառ օգտագործելու համար Դավիթին առաջադրել են ոչ թե վիրավորանքի, այլ խուլիգանության մասով մեղադրանք»։

Արայիկ Պապիկյանը գիշերը ձերբակալման դեմ բողոք է ներկայացրել Երևան քաղաքի ընդհանուր իրավասության դատարան, սակայն այն մուտքագրել են առավոտյան, բողոքի մասով քննություն դեռևս նշանակված չէ, այնինչ բերման ենթարկելու 24 ժամը շուտով կլրանա.

«Դավիթի մեղադրանքի հիմքում ընկած է միայն մեկ ոստիկանի ցուցմունք, որի հետ ևս որևէ առերեսում չի եղել։ Ես բացարկ եմ ներկայացրել քննիչի դեմ, սակայն դրա մասով ևս որևէ քննություն չի իրականցվել։ Փաշինյանը Հայաստանը ոստիկանապետություն է դարձրել, բայց տարրական անվտանգություն չեն կարողանում ապահովել»,- ասաց փաստաբանը։

Factor.am-ի հարցին՝ արդյո՞ք Պապիկյանը տեսակցել է վստահորդին, փաստաբանը դրական պատասխան տվեց. «Վիճակը նորմալ էր, կարևորը՝ ընկճված չէր»։

Ռոզա Վարդանյան