Քաղաքականություն
30.06.2023 | 20:32Factor TV–ի հարցազրույցը Արցախի «Ազատ հայրենիք-ՔՄԴ» խմբակցության պատգամավոր Արամ Հարությունյան հետ
– Վաշինգտոնում ավարտվեցին Հայաստան-Ադրբեջան բանակցությունները արտգործնախարարներ Միրզոյանի և Բայրամովի միջև՝ Բլինքենի միջնորդությամբ։ Դրանք ավարտվեցին ըստ օրակարգի, ոչ թե Արցախի ԱԺ պահանջով։ Վստահ եմ՝ տեղյակ եք, որ քննադատություններ ուղղվեցին Արցախի խորհրդարանին, թե ինչու են պահանջում դադարեցնել այդ բանակցությունները, և այդ պահանջն ապակառուցողական որակվեց։ Ի՞նչ նպատակով արվեց Արցախի ԱԺ-ի հայտարարությունը։
-Չգիտեմ՝ միտումնավո՞ր է խեղաթյուրվում մեր հայտարարությունը, թե՞ պարզապես ընկալման խնդիրներով պայմանավորված, բայց մեր հայտարարության մեջ միանշանակ չէր ասվում, թե պետք է դադարեցնել բանակցությունները, այլ ասվում էր, որ մինչև սահմանային լարվածությունը չնվազի, այդ պահին ընթացող բանակցությունները պետք է դադարեցվեն։ Խոսքը չէր վերաբերում ընդհանուր բանակցային պրոցեսին։ Կոնկրետ այդ պահին, երբ երկու արտգործնախարարները բանակցում էին, Ադրբեջանը սահմանին կրակում էր, կարծում եմ, տրամաբանական առաջարկ էր, որ այդ պահին դադարեցվեին բանակցությունները։ Մյուս կողմից՝ այս առաջարկի նպատակը եղել է այն, որ միջազգային այդ հեղինակավոր հարթակն ազդեցություն ունենա, որպեսզի սահմանային լարվածությունը նվազի և կայունություն հաստատվի։ Այս ենթատեքստով պետք է դիտարկել Արցախի ԱԺ-ի հայտարարությունը, ոչ թե բանակցությունների տապալման։ Մենք շատ լավ ենք հասկանում, թե որն է բանակցելու այլընտրանքը, բնականաբար, մենք նոր էսկալացիա չենք ուզում, բայց երբ սահմանիդ կրակում են և հայ զինվորի են սպանում, բնականաբար, նախևառաջ դա պետք է դադարեցնես, և հետո նոր սկսես բանակցել ու խոսել խաղաղությունից։
-Կա տեսակետ, որ վաշինգտոնյան բանակցությունների տապալումը ձեռնտու է Ռուսաստանին։ Գաղտնիք չէ, որ մրցակցություն գոյություն ունի Արևմուտքի և Ռուսաստանի միջև Հայաստան-Ադրբեջան բանակցությունների մոդերատորության շուրջ։ Ձեր հայտարարությունն ընկալվեց ՌԴ շահերի տեսանկյունից, որ միջամտություն է եղել, և որ հենց Մոսկվային է ձեռնտու այդ բանակցությունների տապալումը։
-Սա իրականությանը որևիցե կերպ չի համապատասխանում։ Մեր ամենալուրջ խնդիրն այն է, որ մենք, ցավոք, երկու գերտերությունների շահերի արանքում ենք հայտնվել, բայց նախևառաջ մենք մեր շահերի մասին պետք է մտածենք։ Այդ ընկալումները հասկանում եմ, բայց կարող եմ պնդել, որ դրանք իրականությանը չեն համապատասխանում, և որևէ միտում չկար այդ բանակցությունները տապալելու։ Անկախ նրանից, թե որ հարթակում է, մենք գիտակցում եք, որ պետք է լինի երկխոսություն, և դա պետք է արդյունավետ ավարտ ունենա։ Մեր նպատակը եղել է սահմանային լարվածության նվազումը․ այս մեսիջն էր կրում մեր հայտարարությունը։
Հարցազրույցն ամբողջությամբ՝ տեսանյութում։
Ռոբերտ Անանյան
