Գազի գինը չի բարձրանա. Գարեգին Բաղրամյան․ ՏԵՍԱՆՅՈՒԹ

Օգոստոսի 1-ին գազի սակագինը կվերանայվի և կմնա անփոփոխ։ ՀՀ կառավարության նիստից հետո այս մասին հայտարարեց ՀՀ հանրային ծառայությունները կարգավորող հանձնաժողովի նախագահ Գարեգին Բաղրամյանը՝ հավելելով, որ  այս մասին որոշում կկայացվի վաղը` ՀԾԿՀ նիստի ժամանակ։

Բաղրամյանի խոսքով` դրամ–դոլար փոխարժեքը դրական է ազդել գազի սակագնի վրա։ «Փոխարժեքի դրական արդյունքը հնարավորություն է տվել մեզ ներդրումային ծրագիր իրականացնել համակարգում։ Դա կլինի Երևան քաղաքի գազամատակարարման համակարգի վերականգնումը, որը ենթադրում է Երևան մտնող 4 ուղղություններով բոլոր գազաբաշխիչ կայանների ամբողջությամբ նորերով փոխարինում, ինչպես նաև` նոր խողովակաշարի կառուցում։ Դրա արդյունքում Երևանում սպառվող գազի ծավալը կրկնապատկվելու է»,- հայտարարեց ՀԾԿՀ նախագահը։

Նրա պարզաբանմամբ՝ գազի սակագինը կպահպանվի նույն մակարդակի վրա, քանի որ փոխարժեքով պայմանավորված գնիջեցումը կարող է շատ ռիսկային լինել, այն էլ ամառային ամիսներին։ ՀԾԿՀ նախագահի խոսքով` ամռանը գրեթե գազի սպառում չկա` գազասպառումը եռակի, քառակի անգամ նվազում է։

«Փոխարժեքով պայմանավորված ինչ–որ նվազեցում անել, իսկ հետո աշնանը կամ ձմռանը, եթե ունենանք փոխարժեքի բարձրացում, դա շատ ավելի վատ անդրադարձ կունենա բնակչության համար սահմանված սակագնի վրա»,- ասաց Բաղրամյանը։

Նա նաև տեղեկացրեց, որ գազ սպառողների 70 տոկոսն օգտվում է արդեն փոխարժեքի նվազեցման դրական արդյունքից։ Խոսքը խոշոր սպառողների մասին է, իսկ սովորական բնակչի համար սահմնված է գազի դրամային սակագին։

Մանրամասները՝ տեսանյութում։