05.08.2026 | 17:03
Ձեր ականջներում արձագանքում է Ալեքսանդրովի Великая держава-ն, բայց ՀՀ-ի հիմնը այլ է․ Բաղդասարյան. ՏԵՍԱՆՅՈՒԹ
Գլխավոր դատախազը Factor.am-ի հոդվածն ուղարկել է Կենտրոն և Նորք-Մարաշ վարչական շրջանների դատախազին
Հասարակություն
29.06.2023 | 12:55
Գլխավոր դատախազությունը Factor.am-ի «Բակով հոսող կոյուղաջուր․ շենքի շահագործման թույլտվություն է տրվել առանց կոյուղատար ցանցի և ջրաչափերի» վերտառությամբ նյութն ուղարկել է Երևանի քաղաքի Կենտրոն և Նորք-Մարաշ վարչական շրջանների դատախազի քննարկմանը։
Factor.am-ն ավելի քան մեկ ամիս առաջ գրել էր, թե ինչպես Երևանի Գարեգին Հովսեփյան 24/30 և 24/33 հասցեների բնակիչներն ամիսներ շարունակ ստիպված են իրենց բնակարաններ ելումուտ անել՝ փորձելով շրջանցել շենքերի մուտքերից մի քանի մետր հեռավարությամբ հոսող կոյուղաջրերը։
Այս շենքերին առնչվող խնդիրները, սակայն, այսքանով չէին սահմանափակվում։ Վթարված կոյուղագիծը հետևանք է մեկ այլ՝ ավելի գլոբալ խնդրի։ Բնակիչների պատմելով՝ 2015 թվականին Երևանի քաղաքապետարանի կողմից շահագործման թույլտվություն ստացած շենքերի կոյուղատարը մինչև այժմ միացված չէ Երևանի կոյուղատար համակարգին։
Բացի այդ, Factor․am-ը նաև պարզել էր, որ շուրջ ութ տարի շահագործվող շենքերի բնակիչները չունեն ջրաչափ սարքեր, ուստի սպառած ջրի դիմաց որևէ գումար չեն վճարում։ Կենտրոն և Նորք-Մարաշ վարչական շրջանների դատախազի քննարկման արդյունքների մասին Գլխավոր դատախազությունը Factor.am-ին լրացուցիչ կհայտնի։
Շողիկ Գալստյան
