Քաղաքականություն
28.06.2023 | 13:00ԱՀ Ազգային ժողովի այսօրվա նիստում քննարկվում է հայտարարության նախագիծ՝ հրադադարի խախտումների վերաբերյալ։
Արցախի Հանրապետության խորհրդարանը միաձայն ընդունեց Ադրբեջանի ագրեսիվ քաղաքականությունը դատապարտող հայտարարություն։
Արցախի ԱԺ նախագահ Արթուր Թովմասյանը, մինչև հայտարարությունն Ազգային ժողովում ներկայացնելը, հանդես եկավ ելույթով՝ ընդգծելով, որ Ադրբեջանն Արցախի բնակչությանը հասցրել է բնաջնջման եզրին․ Արցախը երբեք չի եղել ու չի լինելու անկախ Ադրբեջանի կազմում, և դրա շուրջ ցանկացած քննարկում անընդունելի է իրենց համար։
«Դա մեր կարմիր գիծն է, որը ոչ ոք իրավունք չունի խախտելու: ԵԱՀԿ ՄԽ համանախագահները և այդ երկրների առաջնորդները պետք է հասկանան, որ մեր երկրի բռնակցումն Ադրբեջանին կբերի Արցախի հայաթափմանն ու ոչնչացմանը։ Փոքրիկ Արցախն իրենից վտանգ չի ներկայացնում, բայց վտանգված է մեր ժողովրդի անվտանգ ու լիարժեք ապրելու իրավունքը։ Ցավալի է, որ այդ ամենը տեղի է ունենում միջազգային հանրության լուռ համաձայնությամբ»,– շեշտեց Թովմասյանը։
Արցախի ԱԺ նախագահը նաև ընդգծեց, որ իրենք բարձր են գնահատում ԵԽԽՎ–ի` «Լաչինի միջանցքով ազատ, անվտանգ մուտքի ապահովումը» խորագրով բանաձևը, ԱՄՆ–ի կոնգրեսում Լեռնային Ղարաբաղի ժողովրդի իրավունքների և անվտանգության վերաբերյալ հայտարարությունները, Ֆրանսիա–Արցախ բարեկամական շրջանակի` «Խոսքից պետք է անցնել գործի» հայտարարարությունը։
Արթուր Թովմասյանը դիմեց ՄԱԿ–ին և ԵԱՀԿ Մինսկի խմբի համանախագաներին` Բաքվի նկատմամբ պատժամիջոց կիրառելու համար․ «Կարծում եմ՝ քաղաքակիրթ աշխարհն ունի բոլոր լծակները համապատասխան պատժամիջոցներ կիրառելու Ադրբեջանի ռեժիմի դեմ, քանզի Ադրբեջանը ոչ միայն արհամարհում, այլև ոտնահարում է ՄԻԵԴ և Արդարադատության միջազգային դատարանի որոշումները»:
Մանրամասները՝ տեսանյութում։
