Փաշինյանը զրուցել է Իրանի նախագահի հետ․ Ռուբինյանը՝ ԵԽԽՎ բանաձևի և Բաքվի վրա ճնշման մասին․ Լուրեր

• Վարչապետ Նիկոլ Փաշինյանը հեռախոսազրույց է ունեցել Իրանի նախագահ Էբրահիմ Ռայիսիի հետ։ ՀՀ վարչապետի աշխատակազմից հայտնել են, որ զրուցակիցները քննարկել են տարածաշրջանային զարգացումներին, Հայաստանի և Իրանի միջև հարաբերությունների հետագա զարգացմանն ու օրակարգային հարցերին վերաբերող թեմաներ: Կողմերն ընդգծել են բարձր մակարդակի փոխայցելությունների և շփումների կարևորությունը:
• Խնդրահարույց է, որ Ադրբեջանը չի ասում, որ ճանաչում է ՀՀ տարածքային ամբողջականությունը։ Այս մասին այսօր ասել է ՀՀ ԱԺ փոխխոսնակ, ՔՊ անդամ Ռուբեն Ռուբինյանը։ Նա նշել է, թե ԵԽԽՎ–ում ընդունված փաստաթուղթը Ադրբեջանի վրա ճնշում գործադրելու ևս մեկ լծակ է տվել։ ԵԽԽՎ–ն հունիսի 22-ին քվեարկությամբ ընդունել է «Լաչինի միջանցքով ազատ ու անվտանգ մուտքի ապահովումը» բանաձևը, որում հստակ ասվում է, թե Լաչինի միջանցքով չկա ազատ և անվտանգ տեղաշարժ։
• Ռուբինյանը նաև պնդել է, որ Հայկական կողմն աշխատանքներ է տանում Թուրքիայի հետ սահմանին գտնվող «Մարգարա» անցակետի սահմանային ենթակառուցվածքների բարելավման ուղղությամբ։ Նրա պնդմամբ՝ վերջին պայմանավորվածությունը եղել է այն, որ զբոսաշրջային սեզոնի սկզբում պետք է ցամաքային սահմանը բացվի երրորդ երկրների քաղաքացիների և դիվանագիտական անձնագիր ունեցող անձանց համար
• ԶՈՒ ամառային զորակոչի մեկնարկի կապակցությամբ ՊՆ Սուրեն Պապիկյանը և ԶՈՒ ԳՇ պետ Էդվարդ Ասրյանն այցելել են ՀՀ ՊՆ կենտրոնական հավաքակայան։ Նախարարն այնտեղ ներկայացրել է ԶՈՒ-ում մեկնարկած «Պաշտպան հայրենյաց» ծրագիրը, որի մասնակից կարող է դառնալ զորակոչիկներից յուրաքանչյուրը և օգտվել ծրագրի ընձեռած հնարավորություններից:

Այս ժամի լուրերը՝ տեսանյութում։