Ես, ըստ անհրաժեշտության, խոսում եմ Թուրքիայի հատուկ ներկայացուցչի հետ. Ռուբեն Ռուբինյան․ ՏԵՍԱՆՅՈՒԹ

Հայկական կողմն աշխատանքներ է տանում Թուրքիայի հետ սահմանին գտնվող «Մարգարա» անցակետի սահմանային ենթակառուցվածքների բարելավման ուղղությամբ։ Այս մասին ԵԽԽՎ–ում ՀՀ ԱԺ պատվիրակության մամուլի ասուլիսին ասաց ԱԺ փոխխոսնակ, արտաքին հարաբերությունների մշտական հանձնաժողովի նախագահ Ռուբեն Ռուբինյանը՝ անդրադառնալով հայ-թուրքական հարաբերությունների կարգավորմանը։

ԱԺ փոխնախագահի հավաստմամբ՝ վերջին պայմանավորվածությունը եղել է այն, որ զբոսաշրջային սեզոնի սկզբում պետք է ցամաքային սահմանը բացվի երրորդ երկրների քաղաքացիների և դիվանագիտական անձնագիր ունեցող անձանց համար․ «Հայկական կողմն աշխատանքներ է տանում Թուրքիայի հետ սահմանին գտնվող «Մարգարա» անցակետի սահմանային ենթակառուցվածքների բարելավման ուղղությամբ։ Այդ աշխատանքներն առաջիկայում կավարտվեն, և Հայաստանը հույս ունի, որ թուրքական կողմը նույնպես կպահպանի պայմանավորվածությունները և այս ամառվա ընթացքում դրանք կիրագործվեն»։

Քաղաքական գործչի խոսքով` ընդհանուր առմամբ, բանակցությունների գործընթացը չի դադարում․ «Ես, ըստ անհրաժեշտության, խոսում եմ Թուրքիայի հատուկ ներկայացուցչի հետ, գործընթացը կանգ չի առել։ Այս պահին նոր հանդիպման վերաբերյալ պայմանավորվածություն չկա, եթե լինի, համապատասխան կարգով հանրությունը կտեղեկացվի»։

Հարցին, թե ինչու հիմա նախկին դիվանագիտական ակտիվությունը չկա, Ռուբինյանը պատասխանեց, որ կողմերը հստակ պայմանավորվածության իրականացման շուրջ են աշխատում, ներկայիս իրավիճակում վստահության որոշակի դեֆիցիտ կա, սակայն նախանշված ծրագրերի իրականացումը կարող է բարձրացնել վստահության մակարդակը։

Մանրամասները՝ տեսանյութում։