07.10.2026 | 14:23
Հարավային Կովկասում կայուն խաղաղության հեռանկարն ավելի իրատեսական է թվում, քան նախկինում․ Չավուշօղլու
ԱՄՆ-ում Միրզոյան-Բայրամով բանակցությունները կարող են տևել մինչև հունիսի 29-ը
Քաղաքականություն
26.06.2023 | 12:15
Ադրբեջանի և Հայաստանի ԱԳ նախարարներ Ջեյհուն Բայրամովն ու Արարատ Միրզոյանը պատրաստ են խաղաղ բանակցությունների նոր փուլ սկսել վաղը՝ հունիսի 27-ին, որպեսզի փորձեն հաղթահարել տարաձայնությունները և կնքել երկարաժամկետ խաղաղության համաձայնագիր։ Այս մասին ադրբեջանական Թուրան գործակալությանը հայտնել են Վաշինգտոնում երկու դիվանագիտական աղբյուրներ։
Նրանց խոսքով՝ բանակցությունները, որոնք ի սկզբանե պետք է սկսվեին երկու շաբաթ առաջ, հետաձգվել էին «ժամանակացույցի հետ կապված խնդիրների» պատճառով։ «Այլ պատճառ չկար, բացի ժամանակացույցի հետ կապված խնդիրներ»,-ասել է դիվանագետներից մեկը:
Հիշեցնենք, որ բանակցությունները հետաձգվել էին Ադրբեջանի խնդրանքով։
Սա պետքարտուղար Էնթոնի Բլինկենի հրավերով խաղաղ բանակցությունների երկրորդ փուլն է լինելու։ Սպասվում է, որ երկու երկրների ԱԳ նախարարները վերսկսելու են իրենց փակ քննարկումները։ Ինչպես ասել է աղբյուրներից մեկը, հանդիպումը նախորդ անգամվա պես տեղի է ունենալու Արլինգթոնի Ջորջ Շուլցի արտաքին հարաբերությունների ազգային ուսումնական կենտրոնում:
Մյուս աղբյուրն էլ հայտնել է, որ բանակցությունները կարող են տևել մի քանի օր, մինչև հունիսի 29-ը։ Լրատվամիջոցը նաև նշում է, որ երկու երկրների ԱԳ նախարարները նաև հանդիպելու են Սպիտակ տան Ազգային անվտանգության խորհրդի ներկայացուցիչների հետ։ Հավելենք, որ ԱՄՆ-ում նախորդ բանակցությունները տեղի էին ունեցել մայիսի 1-4-ը։
Էմմա Չոբանյան
