Մինսկի խումբը սպասելու է, որ երկու կողմն էլ կրակի, նոր հայտարարություն անի. Թևան Պողոսյան

Հայկական ատլանտյան ասոցիացիայի գործադիր նախագահ, Ազգային ժողովի նախկին պատգամավոր Թևան Պողոսյանի համոզմամբ՝ Ադրբեջանը փորձում է հայկական կողմին ներգրավել հյուծող պատերազմի մեջ՝ ժամանակ առ ժամանակ սրացումների գնալով: «Պետք է փորձենք կանխարգելիչ գործողություններով թույլ չտալ այդ սրացումները: Մինսկի խմբի համանախագահների հայտարարությունները լինում են, երբ հայկական կողմն է պատասխան գործողությունների դիմում, իսկ մինչ այդ քնած են»,-Factor.am-ի հետ զրույցում ասաց Թևան Պողոսյանը:

Նա կոչ արեց զերծ մնալ մտածելակերպից, որ ԵԱՀԿ Մինսկի խումբը պետք է հասցեական հայտարարություններ անի: «Մինսկի խումբը սպասելու է, որ երկու կողմն էլ կրակի՝ նոր հայտարարություն անի, և դիմելու է երկու կողմին: Եթե, օրինակ, Ադրբեջանը մեկ շաբաթ շարունակ կրակի, և հայկական կողմը չպատասխանի, ապա այդ մեկ շաբաթվա մեջ էլ հայտարարություն չի անելու, հենց մենք պատասխանենք, նոր հայտարարություն կանեն, և հակառակը»,- նշեց մեր զրուցակիցը՝ հավելելով, որ ԵԱՀԿ Մինսկի խումբն արդեն մեկ տարի է՝ չի կարողանում ԵԱՀԿ գրասենյակի դիտորդական առաքելությունն ընդլայնել:

Հիշեցնենք՝ հուլիսի 4-ին արցախա-ադրբեջանական հակամարտ զորքերի շփման գծում հակառակորդը շարունակել է խախտել հրադադարի պահպանման ռեժիմը տարբեր տրամաչափի ականանետերից, իսկ ժամը 20:20-ի սահմաններում հարավային ուղղությամբ կիրառել է նաև ՏՌ-107 տիպի համազարկային հրթիռային կայանքներ: Արցախի ՊԲ-ն դիմել էր պատասխան գործողությունների, ինչի հետևանքով ադրբեջանական կողմը կորուստներ էր կրել։

Մանրամասները՝ տեսանյութում

Շողիկ Գալստյան