12.12.2024 | 15:20
Հարավային Կորեայի նախագահը խոստացել է «պայքարել մինչև վերջ»
Մեր խնդիրը Սահմանադրությունը կյանքի կոչողների մեջ է. փաստաբան
05.07.2017 | 15:30
«Ժպիտ, ժպիտ, ժպիտ»: Այսպես արձագանքեց փաստաբան Գեւորգ Գյոզալյանը նախագահ Սերժ Սարգսյանի` Սահմանադրության օրվա կապակցությամբ այսօրվա ուղերձին:
Հիշեցնենք՝ Ս. Սարգսյանն իր շնորհավորական ուղերձում նշել էր, որ Սահմանադրության բարեփոխված տարբերակը ավելի մեծ հնարավորություններ է ընձեռում ժողովրդավարության զարգացման համար:
«Եթե ինչ-որ մեկը կարծում է, որ նախկին փաստաթուղթն էր խանգարում երկրում ժողովրդավարության հաստատմանը, ապա դա միայն ժպիտ է առաջացնում: Մենք խնդիր չունենք փաստաթղթի հետ, խնդիր ունենք իրավակիրառ պրակտիկայի հետ, որը շատ ժամանակ հակադրվում է նույն սահմանադրությանը: Կարելի է հոյակապ փաստաթղթեր գրել, բայց ի վերջո փաստաթուղթը պետք է կյանքի կոչել: Մեր խնդիրը փաստաթուղթը կյանքի կոչողների մեջ է, ոչ թե օրենքների: Հայաստանում օրենքները մառազմի են հասնում և մենք անընդմեջ օրենքներ ենք փոխում, բայց դրանից հասարակության վիճակը չի բարելավվում»,-նկատեց փաստաբանը: Նրա ընդգծեց` Սահմանադրության փիլիսոփայությունը բավական խորն է, եթե համեմատենք այսօր առկա իրողությունների հետ, մասնավորապես՝ բռնություններն ու մարդու իրավունքների խախտումները:
«Սահմանադրությունը հենց այն զսպող շապիկն է, որի ուժով պետք է պայքարել բռնությունների և մարդու իրավունքների խախտման դեմ, որովհետեւ այլ մեթոդ չկա»,- Factor. Am-ի հետ զրույցում նշեց փաստաբանը:
Հիշեցմանը, որ ինքը ժամանակին դեմ էր սահմանադրական բարեփոխումներին՝ փաստաբանն արձագանքեց. «Այսօր ևս ես մնում եմ իմ կարծիքին, որովհետև վերջին երկու՝ 2005 և 2015 թվականների սահմանադրական փոփոխությունները և դրա արդյունքները հասարակության մոտ կասկածելի են: Սահմանադրությունն այն փաստաթուղթն է՝ իրավաքաղաքական, որը չպետք է կասկած առաջացնի հասարակության մոտ»:
Փաստաբանը հիշեցրեց, որ 2005 թվականին, այն ժամանակվա ընդդիմության կոչով քաղաքացիների մեծ մասը չմասնակացեց սահմանադրական հանրաքվեին, իսկ 2015 թվականին էլ, ըստ նրա, հանրաքվեն շատ ակտիվ և խայտառակ տեսք ունեցավ, որտեղ ոչ միայն ժողովրդի մասնակցությունն էր սարսափելի, այլ մամուլում եղան հրապարակումներ, որ քաղաքացիները ընտրատեղամաս էին գնացել ընտրակաշառքի ազդեցության ներքո և այդ տեղեկատվությունը չհերքվեց: Գեւորգ Գյոզալյանը, սակայն, հուսով է, որ դեռ հնարավորություն կունենանք տեսնելու, թե ինչպես է նոր սահմանադրությունը գործում.«Սահմանադրությունը «նոր է ընդունվել» և դեռ ունենք ժամանակ` տեսնելու համար, թե այն ինչպես է աշխատում: Թեպետ այսօր դեռ երկրում միաիշխանության ականատեսն ենք»:
Այնուամենայնիվ` փաստաբանն ընդգծեց, որ այսօր իր համար միանշանակ տոն է: «Սա այն տոներից մեկն է, որն ինձ համար առաջին հորիզոնականում է»:
