Երկաթգծի Երասխ-Հորադիզ հատվածի վերաշահագործման շուրջ վերջնական կոնսենսուս կա․ ՀՀ փոխվարչապետ․ ՏԵՍԱՆՅՈՒԹ

Մի կարևոր կոնսենսուս կա առ այն, որ ապաշրջափակման գործընթացը սկսվում է Երասխ-Հորադիզ երկաթգծի վերաշահագործումից, ինչը, կարծում եմ, կարևոր է, որովհետև կոնկրետ է և հասկանալի, թե ինչի մասին է խոսակցոթյունը, խոսակցությունը երկաթգծի մասին է։ Այս մասին այսօր լրագրողների հետ զրույցում նշեց ՀՀ փոխվարչապետ, Ադրբեջանի հետ սահմանազատման հանձնաժողովի նախագահ Մհեր Գրիգորյանը։

«Ես կարծում եմ, որ կա վերջնական ընկալում, որ կարգավորումները պետք է լինեն իրավազորության և ինքնիշխանության ներքո այն երկրների, որոնց տարածքով երկագիծն անցնում է: Դա էլ է շատ կարևոր և ֆունդամենտալ համաձայնություն: Մնացած հարցերի շուրջ դետալներ չեմ հայտնի, որովհետև դեռևս վերջնական կոնսենսուս չկա»,- նշեց փոխարչապետը:

Անդրադառնալով հարցին՝ Բաքուն համաձայնե՞լ է իրավազորության հետ կապված այդ մոտեցմանը, Գրիգորյանը նշեց. «Կարծում եմ՝ այո, որովհետև մենք բազմիցս հայտարարել ենք, որ այդ հարցը որևէ այլ ձևաչափով չենք քննարկելու: Եվ եթե այնուամենայնիվ, կան քննարկումներ, հանդիպումներ, նշանակում է՝ այդ ընկալումը կիսում են առնվազն մեր եռակողմ աշխատանքային խմբի հարթակի բոլոր մասնակիցները»:

Ի պատասխան այն հարցին, թե կա՞ մի կետ, որտեղ հայկական և ադրբեջանական կողմերն ունեն հստակ դիրքորոշում, որ երկու կողմն էլ համաձայն են ճանապարհների ապաշրջափակման հետ կապված, Մհեր Գրիգորյանը նշեց. «Երկաթգծի Երասխ-Հորադիզ հատվածի վերաշահագործումը որպես առաջին փուլ, կարծում եմ՝ վերջնական կոնսենսուս կա: Բոլոր կողմերը հայտարարել են, որ համաձայն են և կիսում են, որ դա այս պահի համարն որպես առաջնային հնարավոր պոտենցիալ պայմանավորվածություն լավ և դրական լուծում է տարածաշրջանի և բոլոր երկրների համար»:

Մանրամասները՝ տեսանյութում։