Սուրիկ Խաչատրյանի որդին կրկին հրազեն է կիրառել. քրեական վարույթ է նախաձեռնվել 

Սյունիքի նախկին մարզպետ Սուրիկ Խաչատրյանի որդու մասնակցությամբ հերթական միջադեպն է տեղի ունեցել։ Նախնական տեղեկություններով՝ հունիսի 19-ին ժամը 20:30-ի սահմաններում Արցախյան խճուղի 45 հասցեում գործող ավտոտեխսպասարկման կետի դիմաց Ա. Բաղդասարյանի և Սյունիքի մարզի բնակիչ Տիգրան Խաչատրյանի միջև վիճաբանություն է տեղի ունեցել, որի ժամանակ վերջինս իր մոտ պահվող հրազենով կրակել և վնասվածք է պատճառել Ա. Բաղդասարյանին:

Նույնը օրը ՆԳՆ ոստիկանության բաժին բժշկական կենտրոնից ահազանգ է ստացվել, որ ժամը 21:40-ի սահմաններում «աջ դաստակի շրջանի մակերեսի պատռած վերք, օտար մետաղական մարմին, աջ թենուրի մակարդակի, հավանաբար հրազենի գնդակից» ախտորոշմամբ իրենց մոտ է տեղափոխվել մի քաղաքացի:

Ինչպես Factor.am-ին հայտնում են Քննչական կոմիտեից՝ Գորիս քաղաքում ավտոտեխսպասարկման կետում Գորիսի բնակչի վնասածք ստանալու և  բուժօգնության դիմելու դեպքի առնչությամբ ՀՀ ՔԿ Սյունիքի մարզային քննչական վարչությունում նախաձեռնվել է քրեական վարույթ ՀՀ քրեական օրենսգրքի 335-րդ հոդվածի 1-ին մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) և 297-րդ հոդվածի 3-րդ մասի (խուլիգանությունը, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ կամ դրա գործադրման սպառնալիքով) հատկանիշներով։

«Առկա են տվյալներ կատարվածին Տ. Խաչատրյանի առնչության վերաբերյալ, որոնք այս պահին վարույթի շրջանակում ստուգվում են։ Իրականացվում է նախաքննություն, ձեռնարկվում են քննչական և օպերատիվ-հետախուզական համապատասխան միջոցառումներ՝ կատարվածի հանգամանքները պարզելու նպատակով»,- մանրամասնեց ՔԿ մամուլի քարտուղար Գոռ Աբրահամյանը։

Հիշեցնենք՝ Սյունիքի նախկին մարզպես Սուրիկ Խաչատրյանի որդին՝ Տիգրան Խաչատրյանը մեղադրվում է 2022 թվականի մայիսին Կառավարության շենքի դիմաց զանգվածային անկարգությունների ժամանակ ոստիկանի նկատմամբ բռնություն գործադրելու համար։ Մեկ ամիս կալանքի տակ մնալուց հետո նա ազատ էր արձակվել, որպես խափանման միջոց ընտրվել էր բացակայելու արգելքը։

Ռոզա Վարդանյան