Բաքվի նպատակը մեկն է՝ ոչնչացնել Արցախը․ ինչ կարող է անել ՀՀ-ն էթնիկ զտում թույլ չտալու համար․ ՏԵՍԱՆՅՈՒԹ

«Սնունդ, դեղորայք և առաջին անհրաժեշտության պարագաներ հայթայթելն օրեցօր ավելի դժվար է դառնում, ամեն օր մտածում ենք՝ ինչ ու որտեղից գնենք»,- Արցախում ապրող Տաթևիկ Խաչատրյանը պատմում է՝ այս խնդրին բախվում է ոչ միայն ինքը, այլ նաև ավելի քան 120 հազար արցախցիներ։

Շուրջ կես տարուց ավելի շրջափակման մեջ գտնվող արցախցիների հումանիտար խնդիրներն ավելի են սրվել երեկվա միջադեպից հետո․ հունիսի 15-ին՝ ժամը 08:40-ի սահմաններում, Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ էին կատարել՝ ՀՀ տարածքում դրոշ տեղադրելու նպատակով։ Հայկական կողմի ձեռնարկած միջոցների արդյունքում փորձը կանխվեց, կողմերը հայտնեցին մեկական վիրավորի մասին։ Ադրբեջանական սադրանքից հետո բոլոր հումանիտար ուղևորափոխադրումներն ու բեռնափոխադրումներն արգելվեցին Բաքվի կողմից:

Այս մասին ահազանգում են նաև Կարմիր Խաչի միջազգային կոմիտեի հայաստանյան գրասենյակից։ Ներկայացուցիչ Զառա Ամատունին նշում է՝ երեկ, անվտանգության նկատառումներից ելնելով, չեն տեղափոխել անգամ ծանր վիճակում գտնվող բուժառուներին։

«Հիվանդների բժշկական օգնության խոչընդոտումը դեմ է միջազգային բոլոր փաստաթղթերին և հումանիտար որևէ սկզբունքի մեջ չի տեղավորվում»,- հակառակորդի գործողությունները դատապարտելով՝ նշում է առողջապահության նախարար Անահիտ Ավանեսյանը։

Մինչև երեկ ծանր վիճակում գտնվող բուժառուների, անձանց տեղաշարժը, ինչպես նաև սննդի մատակարարման հարցը հնարավոր է եղել լուծել Կարմիր խաչի և ռուս խաղաղապահների օգնությամբ, ադրբեջանցիների հետ բանակցել ստացվում էր՝ ծանր գնով։

Արցախցիները մտավախություն ունեն, որ երեկվա միջադեպն իրականում նախազգուշացում է՝ հերթական զիջում պարտադրելու համար։

Արցախցի պաշտոնյաները հերթական անգամ արձանագրում են՝ Լաչինի միջանցքում տեղադրված ապօրինի ադրբեջանական անցակետն ինքնին մեծագույն վտանգ ու խոչընդոտ է Արցախի և Հայաստանի միջև ազատ տեղաշարժի ապահովման հարցում, հակառակորդի նպատակը մեկն է՝ ոչնչացնել Արցախը։

Արցախի կառավարությունը քայլեր ձեռնարկում է՝ առաջ եկած խնդիրների լուծում գտնելու համար, թեև հակառակորդը հստակ ցույց է տալիս, որ կանի այն, ինչ ցանկանում է՝ նշում է Արցախի նախագահի խորհրդական Դավիթ Բաբայանը։

Ի վերջո, ի՞նչ պետք է անի Հայաստանը՝ Արցախի էթնիկ զտումը կանխելու և կես տարուց ավելի ձգնող շրջափակումը հաղթահարելու համար։ Քաղաքագետ Ստյոպա Սաֆարյանը երկու ճանապարհ է առաջարկում։

Ուշագրավ է, որ ինչպես երեկ տարածվող տեսանյութերից է պարզ դառնում, ադրբեջանցիների կողմից ՀՀ ինքնիշխան տարածքում դրոշ տեղադրելու ժամանակ ռուս խաղաղապահները՝ հրամանատար Ալեքսանդր Լենցովի գլխավորությամբ, ոչ միայն չեն խոչընդոտում, այլև ուղեկցում են ադրբեջանցիներին՝ ըստ էության այս կերպ նպաստելով ադրբեջանական սադրանքին։

Մանրամասները՝ տեսանյութում։

Ռոզա Վարդանյան