02.04.2026 | 14:53
Հարցաքննվել եմ 44-օրյա պատերազմի քրեական գործով․ Փաշինյան․ ՏԵՍԱՆՅՈՒԹ
ԵՄ-ն թափանցիկ է Հարավային Կովկասում խաղաղությանն ուղղված իր ներգրավվածության հարցում․ Կլաարն արձագանքել է Զախարովային
Քաղաքականություն
15.06.2023 | 11:53
Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարն արձագանքել է Հայաստանում ԵՄ առաքելության կողմից երեք նոր օպերատիվ կետերի բացման վերաբերյալ ՌԴ ԱԳՆ պաշտոնական ներկայացուցիչ Մարիա Զախարովայի հայտարարությանը։
«ԵՄ-ն եղել և մնում է լիովին թափանցիկ Հարավային Կովկասում խաղաղությանն ուղղված իր ներգրավվածության հարցում։ Եվ մենք կշարունակենք աշխատել՝ ի շահ ազգերի ու ժողովուրդների։ ՀՀ-ում ԵՄ դիտորդական առաքելությունն այդ պարտավորության կարևոր տարր է »,- ասվում է Կլաարի թվիթերյան գրառման մեջ։
Զախարովան հայտարարել էր, թե տեղյակ են «Հայաստանում իր ներկայությունն ուժեղացնելու համար Եվրամիության հայտարարած ծրագրերի մասին, որ ԵՄ դիտորդական առաքելությունը երեք նոր կետ է բացում Կապանում, Իջևանում և Եղեգնաձորում»։
«ԵՄ անդամներն ի սկզբանե գործել են ծայրահեղ ոչ թափանցիկ։ ԵՄ ներկայության տեղակայումը Հայաստանի տարածքում հարկադրված էր՝ Բրյուսելի լուրջ ճնշման ներքո։ Եվրոպացիները գործանականում պարտադրել են իրենց ներկայությունը։ Առաքելության մեկնարկը, որի նպատակը Բաքվի ու Երևանի միջև հարաբերությունների կարգավորմանը նպաստելն է, տեղի է ունեցել միակողմանի, ոչ կոնսենսուային հիմքով, առանց ադրբեջանական կողմի, տարածաշրջանային խաղացողների համաձայնության։ Սա միայն հաստատում է տարածաշրջանում ԵՄ քաղաքականության իրական նախապատմությունը, որի համար գլխավորը Ռուսաստանին Անդրկովկասից դուրս մղելն է, Հարավային Կովկասն աշխարհաքաղաքական առճակատման ասպարեզի վերածելը՝ ի վնաս այստեղ ապրող մարդկանց հիմնարար շահերի»,- նշվում է ՌԴ ԱԳՆ ներկայացուցչի հայտարարության մեջ։
Ըստ Զախարովայի՝ «Հայաստանում ԵՄ դիտորդական բազաների թվի ավելացումը կապ չունի Բաքվի և Երևանի հարաբերություններում կայունության և խաղաղության հաստատման խնդրի հետ»։ Ուշագրավ է, որ պաշտոնական Բաքուն, ի տարբերություն Մոսկվայի, այս հարցում որևէ առարկություն չի ներկայացրել։
Էմմա Չոբանյան
