ԵՄ առաքելությունը արձանագրում է միջադեպերը և հայտնում անդամ երկրներին. Սարգիս Խանդանյան․ ՏԵՍԱՆՅՈՒԹ

Երասխի ուղղությամբ Ադրբեջանի զինված ուժերի հրաձգությունը և նաև քաղաքացիական նշանակության օբյեկտների թիրախավորումը մտահոգիչ է։ ԱԺ-ում ճեպազրույցի ժամանակ այս մասին նշեց ՀՀ ԱԺ արտաքին հարաբերությունների հանձնաժողովի նախագահ Սարգիս Խանդանյանը՝ հավելելով, որ հնարավոր զարգացումների մասին կխուսափի որևէ մեկնաբանություն անել։

«Իհարկե, մտահոգիչ են վերջին շրջանի փոխհրաձգությունները, հատկապես, երբ դրանց զուգահեռ են ընթանում բանակցային գործընթացին։ Ադրբեջանը փորձում է ավելի ագրեսիվ վարքագիծ դրսևորել, որպեսզի փորձի ավելին ստանալ բանակցությունների սեղանի շուրջ։ Գործարանի շինարարության ուղղությամբ էր եղել հրաձգությունը, որտեղ ամերիկյան ներդրումներ կան, ու այն չափազանց կարևոր նախագիծ է մեզ համար»,- ընդգծեց պատգամավորը։

«ԵՄ առաքելությունը արձանագրում է միջադեպերը և հայտնում անդամ երկրներին»,- նշեց Խանդանյանը։ Նրա կարծիքով՝ ԵՄ քաղաքացիական առաքելությունը երեկ տեղի ունեցած միջադեպը ևս կարձանագրի և կզեկուցի Եվրոպական հանձնաժողովին ու անդամ երկրներին։

Ադրբեջանական ագրեսիան զսպելու լավագույն տարբերակը, ըստ Սարգիս Խանդանյանի, խաղաղության օրակարգով շարժվելն է։

«ՀՀ կառավարությունն արդեն արել է ավելին` ցույց տալու համար իր հանձնառությունն ու նվիրվածությունը այս գործընթացին։
Մեր կոչն է և պահանջն է մեր միջազգային գործընկերներին, որպեսզի զսպեն ադրբեջանական ագրեսիան»,- նշեց ՀՀ ԱԺ արտաքին հարաբերությունների հանձնաժողովի նախագահը։

Հիշեցնենք, որ այսօր՝ հունիսի 14-ին, ՊՆ-ից հայտնել են, որ ժամը 11:45-ի սահմաններում Երասխում կառուցվող մետալուրգիական գործարանի ուղղությամբ Ադրբեջանի սադրանքի հետևանքով վիրավորում է ստացել օտարերկրյա 2 քաղաքացի: ՊՆ-ից հայտնել են նաև, որ այսօր Երասխում օտարերկրյա ներդրումների միջոցով կառուցվող մետալուրգիական գործարանի ուղղությամբ ադրբեջանական կրակի հետևանքով վիրավորում են ստացել գործարանի կառուցման շինարարական աշխատանքներում ներգրավված Հնդկաստանի քաղաքացիներ Մուհամադ Ասիֆը և Միրհասան Սահաջանը:

Մանրամասները՝ տեսանյութում։