02.03.2025 | 13:34
Ինչ-որ մեկը սպասում էր, որ ես կքննադատեմ Զելենսկիին․ դա այն չէ, ինչ հիմա պետք է երկրին․ Պորոշենկո
Պատճառվել է 0 դրամի նյութական վնաս. Ե. Վարոսյանն՝ Արա Վարդանյանի շուրջ կատարվողի մասին
04.07.2018 | 22:40
Փաստաբան Երվանդ Վարոսյանն այն համոզման է, որ Հայաստան համահայկական հիմնադրամի ղեկավար Արա Վարդանյանի վերաբերյալ Ազգային անվտանգության ծառայության տարածած հաղորդագրության մեջ մատնանշված հանգամանքները հեռու են իրականությունից և դեռ պետք է ապացուցել․ «Ես կարծում եմ, որ այն, ինչի մեջ կասկածվում է Արա Վարդանյանը, իրականությանը չի համապատասխանում։ Ես լիահույս եմ, որ Ազգային անվտանգության ծառայությունը հաղորդագրության մեջ տարածածը կպարզի»,-Factor.am-ի հետ զրույցում ասաց Արա Վարդանյանի փաստաբան Երվանդ Վարոսյանը։
Վերջինս նշեց, որ Արա Վարդանյանը ոչ մի լումա հիմնադրամի միջոցներից չի ծախսել, հետևաբար, Հայաստան համահայկական հիմնադրամի ղեկավարը վնաս չի պատճառել իր ղեկավարած կառույցին, իսկ այդ դեպքում անհասկանալի է՝ ինչու է նման հաղորդագրություն, առհասարակ, տարածվել։
Հարցին էլ՝ արդյոք Ազգային անվտանգության կողմից նման հաղորդագրության տարածումը միտումնավոր քայլ էր, Երվանդ Վարոսյանը չցանկացավ պատասխանել՝ զերծ մնալով գնահատական տալուց և մեկնաբանությունից։
Նշենք, որ ավելի վաղ Երվանդ Վարոսյանն իր ֆեյսբուքյան էջում ևս անդրադարձել էր Արա Վարդանյանի ձերբակալմանը և նշել, որ հիմնադրամի անվամբ բացված վարկային գծի բանկային քարտից կատարել են վճարումներ, այդ թվում Ա.Վարդանյանի անձնական կարիքների համար, որոնք սահմանված ժամկետում իր իսկ միջոցներից վերադարձվել են հիմնադրամի բանկային հաշվին, ու ոչ հիմա, այլ հենց ընթացքում։
Արդյունքում` Հայաստան համահայկական հիմնադրամին, կամ այն բանկին, որի միջոցներն են օգտագործվել, պատճառվել է 0 դրամի նյութական վնաս։
Փաստաբան Երվանդ Վարոսյանը նաև հայտնել է, որ Արա Վարդանյանը 0 դրամ է ծախսել սփյուռքահայերի հանգանակություններից։
Որպես հետգրություն՝ փատաբանը նշել էր, որ անձնական միջոցներով խաղադրույքներ կատարելը լավ բան է, թե ոչ, յուրաքանչյուրս ունենք մեր կարծիքը, բայց դա խաղադրույք կատարողի անձնական գործն է:
Երվանդ Վարոսյանը նաև ԱԱԾ-ի երեկվա հաղորդագրության հետ կապված հայտնել է իր մտահոգությունը և նշել․ «Իսկ թե ինչքան վնաս պատճառեցին երեկվա հաղորդագրությունները Հայաստան համահայկական հիմնադրամին, դատեք ինքներդ»։
