Քաղաքականություն
09.06.2023 | 19:00Սոչիում ՌԴ նախագահ Վլադիմիր Պուտինի հետ հանդիպման մեկնարկին ՀՀ վարչապետ Նիկոլ Փաշինյանը նշել է, որ, ի թիվս այլ հարցերի, քննարկելու են Լեռնային Ղարաբաղում ռուս խաղաղապահների պատասխանատվության գոտում տիրող իրավիճակը։ Այս մասին տեղեկանում ենք Կրեմլի մամուլի ծառայության տարածած հաղորդագրությունից։
«Մենք պարբերաբար հանդիպում ենք և քննարկում հարցերի լայն շրջանակ։ Այսօր մենք կքննարկենք նաև երկկողմ օրակարգային և տարածաշրջանային հարցեր։ Կարծում եմ, որ այսօր կքննարկենք նաև Լեռնային Ղարաբաղում ռուս խաղաղապահների պատասխանատվության գոտում տիրող իրավիճակը։ Ցավոք, այնտեղ հումանիտար իրավիճակը շարունակում է լարված մնալ։ Լեռնային Ղարաբաղում մի քանի ամիս է՝ գազ և լույս չկա. Լաչինի միջանցքում իրավիճակը շարունակում է մնալ բավականին լարված։ Ի դեպ, պետք է ընդգծեմ, որ այժմ սննդամթերքի առաքումները Լեռնային Ղարաբաղ իրականացվում են ռուս խաղաղապահների օգնությամբ, իսկ դա սննդի սահմանափակ քանակություն է։ Ընդհանուր առմամբ, հումանիտար ճգնաժամը Լեռնային Ղարաբաղում շարունակվում է, և սա նույնպես շատ կարևոր խնդիր է։ Համոզված եմ, որ մենք այսօր կքննարկենք դա»,- ասել է Փաշինյանը։
Նա նաև ՌԴ նախագահին շնորհավորել է գալիք տոնի՝ Ռուսաստանի օրվա կապակցությամբ և մաղթել բարօրություն Ռուսաստանի Դաշնությանը։
