15.01.2025 | 10:31
Տրանսպորտային քարտերը հնարավոր է ձեռք բերել նաև Երևանի մետրոպոլիտենի 10 կայարաններից․ քաղաքապետարան
ԱԳՆ-ն առաջարկում է՝ վարչապետը, նախագահը և ՀՀ ժամանած պատվիրակություններն օդանավակայանում ստուգումներ չանցնեն
Քաղաքականություն
06.06.2023 | 17:41
Արտաքին գործերի նախարարությունն առաջարկում է սահմանել Հայաստանի Հանրապետության պետական սահմանով բացթողնման պարզեցված կարգ։ Ըստ գերատեսչության կողմից e-draft իրավական ակտերի նախագծերի հրապարակման միասնական կայքում ներկայացված նախագծի՝ պարզեցման արդյունքում Հանրապետության նախագահը, վարչապետը, Ազգային ժողովի նախագահը, Անվտանգության խորհրդի քարտուղարը և անդամները, Ամենայն հայոց կաթողիկոսը՝ Հայաստանի Հանրապետության պետական սահմանում կազատվեն նույնականացման գործընթացն անձամբ անցնելու պահանջից։
Բացի նրանցից, պարզեցման կարգից կօգտվեն նաև ՀՀ ժամանող օտարերկրյա պետությունների, կառավարությունների, խորհրդարանների, փոխվարչապետերի, միջազգային կազմակերպությունների և այլ միջազգային կառույցների ղեկավարների և նրանց լիազորած պաշտոնատար անձանց, Սահմանադրական դատարանների նախագահների, գլխավոր դատախազների, նախարարների և նախարարին հավասարազոր կամ ավելի բարձր կարգավիճակ ունեցող պաշտոնյաների գլխավորած պատվիրակությունները։
«Օտարերկրյա բարձրաստիճան պաշտոնատար անձինք ստիպված են լինում անցնել իրենց և իրենց անձնական ուղեբեռի անվտանգության ստուգում և զննում, անձամբ ներկայանալ սահմանապահին, անցնել նույնականացման գործընթաց, պատասխանել սահմանապահի հարցերին, ինչը հաճախ պատվիրակությունների համար դժգոհության առիթ է հանդիսանում: Բացի այդ, շատ երկրներում՝ օտարերկրյա և ՀՀ պատվիրակությունները ազատվում նման պահանջից, և Հայաստանի Հանրապետություն ժամանելիս ակնկալում են կիրառել փոխադարձության սկզբունք»,- նշվում է նախագծի հիմնավորման մեջ։
Առաջարկվող փոփոխության համաձայն՝ օտարերկրյա պատվիրակությունների ղեկավարները, իրենց ձեռքի իրերը և ուղեբեռը ազատվում են անվտանգության ապահովման նպատակով իրականացվող զննման ընթացակարգերից։
«ՀՀ արտաքին գործերի նախարարության պետական արարողակարգի ծառայությունը, յուրաքանչյուր այցից առաջ առանձին գրություն կուղարկի ՀՀ ԱԱԾ սահմանապահ զորքերի հրամանատարին՝ խնդրելով ազատել պատվիրակությանը կամ ղեկավարին սահմանային անցման կետերում նույնականացման գործընթացն անձամբ անցնելու պահանջից, իսկ «Զվարթնոց» օդանավակայան հասցեագրված գրությամբ՝ նաև պատվիրակության ղեկավարի անձնական ուղեբեռի անվտանգության ստուգման և զննման պահանջից։ Նախագծի ընդունման արդյունքում հնարավոր կլինի կանոնակարգել պետական սահմանի հատման կարգը և ցուցաբերել համակարգային մոտեցում»,- մանրամասնում են գերատեսչությունը։
Նախագիծը հանրային քննարկման է ներկայացվել նախօրերին, քաղաքացիները դրա մասով կարող են կարծիք հայտնել մինչև հունիսի 20-ը։ Այս պահի դրությամբ առաջարկվող փոփոխությունն ավելի շատ «Դեմ» ձայներ է ստացել։
Ռոզա Վարդանյան
