23.11.2024 | 15:55
Իսրայելի օդուժը հարվածներ է հասցրել Բեյրութի կենտրոնին ու արվարձաններին
Կախովկա ՀԷԿ-ի ամբարտակը քանդվել է․ բնակչությանը տարհանում են
Քաղաքականություն
06.06.2023 | 10:55
Ուկրաինայի Խերսոնի մարզում քանդվել է Կախովկա հիդրոէլեկտրակայանի ամբարտակը, որի համար Կիևը մեղադրում է Ռուսաստանին, գրում է DW-ի ռուսական ծառայությունը։
«Ռուսական օկուպացիոն զորքերը պայթեցրել են Կախովսկայա հիդրոէլեկտրակայանը։ Այս պահին ճշտվում է ավերավածության մասշտաբը, ջրի արագությունն ու ծավալը, հեղեղումների հավանական վայրերը։ Բոլոր ծառայությունները գործում են»,- վաղ առավոտյան ֆեյբուքում հայտնել է Ուկրաինայի «Հարավ» օպերատիվ հրամանատարությունը։
Խերսոնի շրջանային ռազմական վարչակազմի ղեկավար Ալեքսանդր Պրոկուդինը կարճ տեսաուղերձում հաստատել է հիդրոէլեկտրակայանի ամբարտակի պայթյունը։ Նրա խոսքով՝ ջուրը կրիտիկական մակարդակի կհասնի 5 ժամից։ Սկսվել է տեղի բնակչության տարհանումը վտանգավոր շրջաններից։
Ուկրաինայի ՆԳՆ-ն էլ հայտարարել է ոստիկանության ու Խերսոնի շրջանի Արտակարգ իրավիճակների պետական ծառայության ստորաբաժանումների աշխատանքի մասին՝ խաղաղ բնակչությանը զգուշացնելու և տարհանելու Դնեպր գետի աջ ափի հնարավոր հեղեղումների գոտիներից։
Միաժամանակ ՌԴ-ն հերքում է իր առնչությունը ամբարտակի քանդմանը։ ՌԴ-ի կողմից գրավված Նովայա Կախովկայի քաղաքապետ Վլադիմիր Լեոնտևը ռուսական պետական լրատվամիջոցների հետ զրույցում նախ հերքել է, որ ՀԷԿ-ի տարածքում պայթյուն է եղել, ապա ՏԱՍՍ-ի հետ զրույցում հայտարարել, որ օբյեկտում «գիշերային հարվածների» հետևանքով փականները քանդվել են, և ջրի անվերահսկելի արտահոսք է տեղի ունենում։
