Ադրբեջանի տարածքային ամբողջականությունը միշտ էլ ճանաչել ենք՝ որոշակի հայկական «շուստրիությամբ»․ Միրզոյան․ ՏԵՍԱՆՅՈՒԹ

Ո՛չ ես, ո՛չ էլ ՀՀ վարչապետ Փաշինյանը մեզ իրավունք չենք վերապահում, և օբյեկտիվորեն դրա իրավունքն էլ չունենք, որոշել Լեռնային Ղարաբաղի ճակատագիրը։ Ազգային ժողովում արտաքին հարաբերությունների ու ֆինանսավարկային և բյուջետային հարցերի մշտական հանձնաժողովների համատեղ նիստի ժամանակ այս մասին նշեց ՀՀ արտաքին գործերի նախարար Արարատ Միրզոյանը։

«Մենք վտահ ենք, որ ԼՂ ժողովրդի անվտանգության և իրավունքների հարցերը պետք է հասցեագրվեն և քննարկվեն Լեռնային Ղարաբաղի և պաշտոնական Բաքվի միջև՝ երկխոսությամբ։ ԼՂ ժողովուրդն է շահառուն և ինքն է որոշում կայացնողը։ Եվ այդպիսի որոշումներ ընդունելու համար ունեն ընտրված մարմիններ, որքան էլ որ դա վիճարկվի Ադրբեջանի կողմից»,- նշեց Միրզոյանը։

ՀՀ արտաքին քաղաքական գերատեսչության ղեկավարի խոսքով` բանակցությունների ընթացքում ՀՀ-ն միջազգային գործընկերներին փորձում է ցույց տալ, որ կա ԼՂ խնդիր, կա կոնֆլիկտի պատմություն, և շեշտում, որ Հայաստան–Ադրբեջան հարաբերությունների կարգավորման գործընթացի ամբողջականության համար պետք է ստեղծվի երկխոսության հարթակ, որտեղ կարող են Ղարաբաղը և Բաքուն քննարկել հարցեր։
«Առանց դրա ՀՀ-ի և Ադրբեջանի միջև կնքված պայմանագիրը կարող է չաշխատել։ ՀՀ-ն անում է ամեն ինչ, որպեսզի այդ հարթակը ստեղծվի, այդ միջավայրն ապահովվի։ Ընդ որում՝ կարծում ենք, որ այնտեղ պետք է լինի միջազգային ներգրավվածություն, այլապես մտավախություն ունենք, որ Ադրբեջանն այն կվերածի իմիտացիոն գործընթացի»։

«Ադրբեջանի տարածքային ամբողջականությունը միշտ էլ ճանաչել ենք՝ որոշակի հայկական «շուստրիությամբ»,- ասաց Միրզոյանը։- Այն, որ ԼՂ ժողովրդի գլխին կախված է էթնիկ զտումների վտանգը, սա անհրաժեշտ է դարձնում ԼՂ ժողովրդի իրավունքների և անվտանգության վերաբերյալ հատուկ քննարկումը՝ միջազգային տեսանելիությամբ»։

Մանրամասները՝ տեսանյութում։