15.01.2025 | 02:30
Միրզոյանն ու Բլինքենը նաև քննարկել են ՀՀ-ԵՄ գործընկերության խորացմանը միտված գործընթացը
Կարկուտը վնասել է բանջարեղենի բերքը. մեծամորցիները մի քանի ժամ փակ են պահել Արմավիր-Զարթոնք ավտոճանապարհը
Հասարակություն
05.06.2023 | 14:50
Երեկ տեղացած կարկուտը զգալի վնաս է հասցրել Արմավիրի մարզի մի շարք գյուղերի։ Եղեգնուտ համայնքի բնակիչ Արտյոմ Մնացականյանը Factor.am-ի հետ զրույցում պատմեց, որ 1 հեկտար տարածքով բանջարանոցը գրեթե ամբողջությամբ վնասվել է։ Գյուղատնտեսի խոսքով՝ լոլիկի, ձմերուկի, բադրիջանի և լոբու բերքը, որի վրա զգալի ներդրում էր արել, ոչնչացել է․
«Միլիոններով գումար ենք ներդնում, որ սեզոնը գա հանենք, մեկ էլ մի բանից լրիվ ավիրվում ա։ Հակակարկտային կայանները երեկ ուշացումով են գործել, էդ էլ մի կողմից»,- դժգոհեց Մնացականյանը։
Նա և իր համագյուղացիների մեծ մասը, նաև Մեծամոր խոշորացված համայնքի Զարթոնք, Արգավանդ և Արտաշար գյուղերի բնակիչները, որոնց բանջարանոցներն ու այգիները ևս խոշոր վնաս են կրել, այսօր փակել էին Արմավիր-Զարթոնք ավտոճանապարհը՝ պահանջելով կատարել վնասների ուսումնասիրություն և փոխհատուցում: Մի քանի ժամ անց բողոքի մասնակիցների հետ հանդիպել է համայնքի ղեկավարի տեղակալ Արբակ Եղիազարյանը, ինչից հետո արգելափակված ճանապարհը բացել են։
«3 օր ժամանակ ենք տվել, որպեսզի հարցով զբաղվեն, դրանից հետո պարզ կլինեն մեր անելիքները»,- նշեց Մնացականյանը։
Ռոզա Վարդանյան
