13.01.2025 | 22:44
Ադրբեջանցի ընդդիմադիր ակտիվիստը դատարանի դահլիճում ինքնասպանության փորձ է արել
Դիահերձարաններում ստուգումներ կիրականացվեն
02.06.2023 | 10:48
ՀՀ առողջապահական և աշխատանքի տեսչական մարմինն այս տարի ստուգումներ է իրականացնելու հանրապետության դիահերձարաններում։ Տեսչական մարմնի 2023 թ-ի ստուգման ծրագրում ներառված է «Դատաբժշկական գիտագործնական կենտրոն» ՊՈԱԿ-ը, այդ թվում՝ կենտրոնի բոլոր բաժինները:
Մոտ 2 տարի առաջ այս օրերին սոցիալական ցանցներում բուռն քննարկումներ ծավալվեցին Աբովյանի դիահերձարանում արձանագրված իրավիճակի շուրջ․ համացանցում լուսանկարներ էին հայտնվել, որոնցում երևում էր, թե ինչպես են 44-օրյա պատերազմում զոհված զինվորների մասունքները պահվում պոլիէթիլենային տոպրակների մեջ, նկուղում՝ հատակի վրա: Տեղեկությունը տարածվելուց հետո Առողջապահության նախարարությունը դիերը տեղափոխեց այլ դատաբժշկական կենտրոնի սառնարանային հատված, նախարարն էլ հանրությոնից ներողություն խնդրեց։
ԱԱՏՄ-ից Factor.am-ի հարցմանն ի պատասխան չեն մանրամասնել, թե ինչ ստուգում է իրականացվելու, միայն նշել են՝ թեմատիկ ստուգում։ Մեր հարցին՝ ե՞րբ է նախատեսվում ավարտել ստուգումը, տեսչական մարմնից հարկ չեն համարել պատասխանել․ ընդամենը մեջբերել են «ՀՀ-ում ստուգումների կազմակերպմա և անցկացման մասին» ՀՀ օրենքի դրույթը՝ «ոչ ավելի, քան 15 անընդմեջ աշխատանքային օր, իսկ անհրաժեշտության դեպքում ստուգումը կարող է երակարաձգվել մինչև 10 անընդմեջ աշխատանքային օր»։
ԱԱՏՄ-ից հավաստիացրել են, թե «Դատաբժշկական գիտագործնական կենտրոն» ՊՈԱԿ-ում տեսչական մարմինը նախկինում թեմատիկ ստուգում չի իրականացրել, նաև դիմում-բողոքի հիման վրա վարչական վարույթ չի հարուցել։
ՀՀ առողջապահության նախարարությունից էլ մեզ վստահեցրին, որ «Դատաբժշկական գիտագործնական կենտրոն» ՊՈԱԿ-ի Աբովյան քաղաքում գտնվող դատաբժշկական փորձաքննությունների բաժինը համալրված է սառնարանային համակարգով, որը համապատասխանում է սահմանված ստանդարտներին։
«ՊՈԱԿ-ի, ինչպես Աբովյան քաղաքի դատաբժշկական փորձաքննությունների բաժնում, այնպես էլ մյուս մարզային բաժիններում պահպանվում են սանիտարահիգիենիկ պայմանները, վերջիններիս վերահսկողությունը իրականացվում է ԱՆ «Դատաբժշկական գիտագործնական կենտրոն» ՊՈԱԿ-ի ղեկավարության կողմից»,- նշել են նախարարությունից։
2 տարի առաջ բացահայտված փաստի կապակցությամբ քննարկում եղավ նաև ՀՀ կառավարության նիստում, որտեղ Քննչական կոմիտեի այն ժամանակվա ղեկավար Հայկ Գրիգորյանը հայտարարեց, որ հարուցվել է քրեական գործ՝ Քրեական օրենսգրքի երկու հոդվածով: Կես տարի տևած քննությունից հետո 2021 թ․ դեկտեմբերի 16-ին վարույթն իրականացնող մարմինը կարճեց քրեական գործով վարույթը։ Մեր հարցմանն ի պատասխան՝ ՔԿ-ից հայտնել են, որ կարճման հիմքը ԱՆ «Դատաբժշկական գիտագործնական կենտրոն» ՊՈԱԿ-ի պաշտոնատար անձանց և համապատասխան աշխատակիցների արարքներում հանցակազմի բացակայությունն է։
Անի Թամրազյան
