Ադրբեջանը չի՛ մտնում Ստեփանակերտ, քանի որ զսպում են գերտերությունները, թույլ չե՛ն տալիս ԼՂ-ի գրավում․ Սուրեն Պետրոսյան․ ՏԵՍԱՆՅՈՒԹ

Արցախն այսօր բոլոր կողմերից շրջափակված է ադրբեջանական զորամասերով։ Իսկ Գորիսից Ստեփանակերտ հնարավոր է հասնել՝ ադրբեջանական անցակետն անցնելու պայմանով։ Ադրբեջանը պահանջում է ԼՂ-ի պետական մարմինների լուծարում, և սպառնում է ռազմական գործողություն սկսել։ Այս ամենն իրականություն է դարձել՝ ռուսական անվտանգային մեխանիզմի գոյության պայմաններում։

Ի՞նչն է այսօր խանգարում Իլհամ Ալիևին՝ կատարել իր սպառնալիքը, և ուժի կիրառմամբ, սպառնալիքով իրականացնել ԼՂ-ի իշխանության մարմինների լուծարում, վատատեսական սցենարներ իրագործել՝ ձերբակալել մարդկանց և այլն։ Ադրբեջանը հղում է անում ՀՀ-ի կողմից Ադրբեջանի տարածքային ամբողջականության ճանաչմանըէ նշելով, որ ԼՂ-ի վրա տարածվում են իր օրենքները։

«Ժողովրդավարական համախմբում» կուսակցության ղեկավար, քաղաքագետ Սուրեն Պետրոսյանը նշում է, որ Ադրբեջանը չի մտնում Ստեփանակերտ, քանի որ նրան զսպում են։

«Իրականում Ադրբեջանը նպատակ ունի Արցախ մտնել, և այդ ռիսկը կախված է մեզանից։ Այո՛, նա չի մտնում Ստեփանակերտ, չի գրավում ԼՂ-ն, քանի որ զսպում են որոշ ուժեր, գերտերությունները թույլ չեն տալիս։ Արցախը մեր քաղաքական պոտենցիալի վառ արտահայտումն է, այն խնդիր չէ, որից պետք է ազատվել։ Հարցն այն է՝ մեր սպառնալիքներին ինչպե՞ս ենք վերաբերվում։ Արցախի շուրջ ձևավորված այս խնդիրը սպառնալիք է և մարտահրավեր՝ ուղղված ՀՀ-ին։ Պրոպագանդա կա, թե ամենավատ պայմաններին պետք է համաձայնվել, չնայած նրան, որ չկա երաշխիք, որ կգործեն այդ պայմանները։ Սա սպառնալիք է։ Արցախի հարցով զիջում է, երբ ՀՀ վարչապետն ասաց՝ Արցախն Ադրբեջանի տարածքային ամբողջականության մաս է կազմում։ Ես կարծում եմ, որ որտեղ կարմիր գիծը դրեցիր, վեճը և բանակցությունը գնալու է այդտեղ»,- ասաց Սուրեն Պետրոսյանը։

Հարցազրույցն ամբողջությամբ՝ տեսանյութում։

Ռոբերտ Անանյան