Նախարարների, փոխնախարարների մեքենաների ապակիների թաղանթները հեռացված են․ Արփինե Սարգսյան․ ՏԵՍԱՆՅՈՒԹ

Մեքենաների դիմապակիների թաղանթները հեռացնելու պահանջը վերաբերում է բոլորին,- լրագրողների հետ զրույցում այս մասին նշեց ՆԳ նախարարի տեղակալ Արփինե Սարգսյանը՝ անդրադառնալով դիտարկմանը, որ այսօրվանից օրենքը պետք է գործի։
«Եթե իմ գործընկերները դեռ չեն հեռացրել, ապա շատ կարճ ժամանակում կապահովենք», – ասաց փոխնախարարը՝ արձագանքելով դիտարկամանը, թե որոշ պաշտոնյաների մեքենաներից դեռևս թաղանթները հեռացված չեն։
Փոխնախարարի խոսքով՝ վարչական պատասխանատվություն է նախատեսվում ապակիների լուսաթափանցելիության չափի ստանդարտը չպահելու մասով։

«Իսկ չափը նախատեսված է ԵԱՏՄ համապատասխան ակտով, որին միացել է ՀՀ կառավարությունը։ ՀՀ-ն ստորագրելով այդ ակտը, պարտավորություն է վերցրել ՀՀ տարածքում դա ապահովելու։ Հետևապես, ասել, թե մենք կարող ենք ծայրահեղ այլ բան նախատեսել, քան ԵԱՏՄ ընդհանուր ստանդարտն է, միանշանակ պնդում լինել չի կարող։ Թեմայի վերաբերյալ այս պահի դրությամբ նոր նախաձեռնություն չունենք», նշեց փոխնախարարը՝ ընդգծելով, որ կա ստանդարտ՝ առջևի կողային ապակիները չեն կարող լինել լուսաթափանցելիության սահմանած չափից ավելի։

«Կլինի գործարանային, թե քաղաքացիներն իրենց միջամտության արդյունքում են թաղանթապատումն ապահովել, էական նշանակություն ունենալ չի կարող։ Եթե ապակին լուսաթափանցելիության բավարար մակարդակ չունի, վարորդը պետք է անձամբ վերացնի դա, հակառակ պարագայում վարչական պատասխանատվության կենթարկվի»,- նշեց Սարգսյանը։

Մանրամասները՝ տեսանյութում։