Մոսկվայից հետո՝ Քիշնև․ այսօր կկայանա Փաշինյան-Ալիև-Շոլց-Մակրոն-Միշել հնգակողմ հանդիպում

Հայաստանի և Ադրբեջանի ղեկավարների հերթական  բանակցությունները տեղի կունենան այսօր՝ հունիսի 1-ին, Մոլդովայի մայրաքաղաքում մեկնարկող Եվրոպական քաղաքական համայնքի (ԵՔՀ) երկրորդ գագաթնաժողովի շրջանակներում։ Հանդիպումն ընդլայնված է, հնգակողմ ձևաչափով․ Նիկոլ Փաշինյանին և Իլհամ Ալիևին կմիանան Ֆրանսիայի նախագահ Էմանուել Մակրոնը, Գերմանիայի կանցլեր Օլաֆ Շոլցը և ԵՄ խորհրդի նախագահ Շառլ Միշելը։

Ֆրանսիայում Ադրբեջանի դեսպան Լեյլա Աբդուլաևան արևմտյան լրատվամիջոցներ հետ զրույցում հայտարարել էր ԵՔՀ երկրորդ գագաթնաժողովի շրջանակներում «Խաղաղության և միջպետական հարաբերությունների հաստատման մասին» համաձայնագրի հնարավոր ստորագրման մասին։ Այնինչ պաշտոնական Երևանը հայտարարեց, որ Քիշնևի բանակցությունների արդյունքում խաղաղության պայմանագրի ստորագրում  նախատեսված չէ։

«Հայաստանի և Ադրբեջանի միջև հարաբերությունների կարգավորման և, մասնավորապես, «Խաղաղության և միջպետական հարաբերությունների հաստատման մասին» համաձայնագրի շուրջ քննարկումները շարունակվում են: Ինչպես բազմիցս նշել ենք, հայկական կողմը պատրաստ կլինի համաձայնագրի ստորագրմանն այն պահին, երբ հասցեագրված կլինեն առանցքային խնդիրները: Կարծում ենք դրանց շուրջ քննարկումները կշարունակվեն հունիսի 1-ին Քիշնևում Եվրոպական քաղաքական համայնքի շրջանակներում նախատեսվող հանդիպման ժամանակ և դրանից հետո: Քիշնևի հանդիպման օրակարգում նշյալ համաձայնագրի ստորագրում ներառված չէ»,- Factor.am-ին հայտնել էր ՀՀ ԱԳՆ մամուլի խոսնակ Անի Բադալյանը:

Հիշեցնենք, որ վերջին անգամ Նիկոլ Փաշինյանի ու Իլհամ Ալիևը հանդիպել էին մայիսի 25-ին Մոսկվայում։ Վլադիմիր Պուտինի կազմակերպած եռակողմ հանդիպումը տևել է մոտ 20 րոպե և ավարտվել մոտ ապագայում տարածաշրջանում տրանսպորտային հաղորդակցությունների ապաշրջափակման հարցերով Ռուսաստանի, Հայաստանի և Ադրբեջանի փոխվարչապետների աշխատանքային խմբի նիստ անցկացնելու պայմանավորվածությամբ, սակայն համատեղ հայտարարություն չէր տարածվել։

Տաթև Ֆռանգյան