03.04.2025 | 22:57
ԱՄՆ Պետդեպը Թրամփի իշխանության գալուց հետո առաջին անգամ մեկնաբանել է Վրաստանում իրավիճակը
«Տունը դարձրել էր դպրոցի ճաշարանի պահեստ». Խաչփարի դպրոցում դեմ են նախկին տնօրենի վերադարձին․ ՏԵՍԱՆՅՈՒԹ
Հասարակություն
31.05.2023 | 23:06
Արարատի մարզի Խաչփար գյուղի միջնակարգ դպրոցում մթնոլորտը թեժ է։ Դպրոցի փոխտնօրեն Սուսաննա Եփրեմյանը, որը 17 տարի այս դպրոցում տնօրեն է աշխատել, պատրաստվում է մասնակցել տնօրենի թափուր պաշտոնի համար հայտարարված մրցույթին։ Աշակերտների ծնողները և մի շարք ուսուցիչներ դեմ են։ Նրանք մատնանշում են դպրոցի ոչ բարվոք վիճակը․ դասարանները, մարզադահլիճը, սանհանգույցները պարզապես ավերակ են հիշեցնում, այնինչ, ըստ նրանց, Եփրեմյանը 17 տարվա ընթացքում ոչինչ չի ձեռնարկել այդ խնդիրները լուծելու համար։
Ուսուցիչները մատնանշում են նաև Եփրեմյանի ղեկավարման տարիներին դպրոցում տիրող բարոյահոգեբանական ծանր մթնոլորտը։
«Շուրջ 19 տարի է՝ աշխատում եմ դպրոցում որպես դասվար, ինչ ոտք եմ դրել այս դպրոց, ականատես եմ եղել միայն վեճի, այնպիսի բաների, որոնց մասին պատկերացում չեմ ունեցել։ Այստեղ բարոյահոգեբանական մթնոլորտը միշտ է եղել լարված, բայց այս վերջին դեպքերից հետո ծայրաստիճան լարված է։ Բոլորին խնդրում եմ՝ չանտեսել մեր բողոքը»,-ասում է ուսուցչուհի Անուշ Հակոբյանը։
Ծնողներն ու որոշ ուսուցիչներ պնդում են՝ Սուսաննա Եփրեմյանը գործել է ամուսնու եղբոր՝ նախկին համայնքապետ Ղազար Մարտիրոսյանի հովանավորությամբ։ Ինքը՝ Եփրեմյանը, վստահեցնում է, որ համայնքապետը երբեք չի խառնվել դպրոցի գործերին, ասում է՝ եթե հնարավոր եղել է, միայն օգնել է։
Ինչ վերաբերում է դպրոցի անմխիթար պայմաններին, նախկին տնօրենը պնդում է՝ ինչ կարողացել է, ժամանակին արել է։
Ծովինար Մարտիրոսյանն ասում է՝ դպրոցի տնօրենի պաշտոնին չի հավակնում, չի էլ առաջադրվելու, պարզապես ցանկանում է, որ այնտեղ բարվոք պայմաններ ու առողջ մթնոլորտ լինեն։
Սուսաննա Եփրեմյանը, մինչդեռ, պնդում է թե Մարտիրոսյանն է կազմակերպել իր դեմ արշավը։ Ասում է՝ Մարտիրոսյանը կապեր ունի կրթության վարչությունում, և նպատակ ունի իրեն հեռացնելուց հետո նոր պաշտոնի անցնել։ Քանի որ մի շարք ծնողներ և ուսուցիչներ չեն ցանկանում, որ Սուսաննա Եփրեմյանը վերադառնա տնօրենի պաշտոնին, պարբերաբար այցելում են դպրոց և իրենց բողոքի ձայնն են բարձրացնում այդ կապակցությամբ։ Նրանց խոսքով՝ Եփրեմյանին աջակցող որոշ ուսուցիչներ ակնհայտ անհարգալից վերաբերմունք են ցուցաբերում հատկապես Եփրեմյանին դեմ ծնողների և նրանց երեխաների նկատմամբ։
Factor TV-ն զրուցել է նաև Արարատի մարզպետարանի Կրթության վարչության պետ Մարտին Մանուկյանի հետ։ Նա հավաստիացրեց, որ տեղյակ է դպրոցում առկա բոլոր խնդիրներից, սահմանված ժամկետներում աուդիտի իրականացումից հետո կանցնեն բարձրացված խնդիրների աստիճանական լուծման։
Մանրամասները՝ տեսանյութում։
Աննա Բաբաջանյան
