Բացառվա՛ծ է, չի՛ քննարկվել նման հարց, դա կարմիր գիծ է. փոխվարչապետ Գրիգորյանը՝ Ալիևի՝ միջանցքի պահանջի մասին

«Հայաստանի սուվերեն ենթակառուցվածքների վրա ամբողջությամբ տարածվելու է Հայաստանի Հանրապետության իրավազորությունը»,- այս մասին լրագրողների հետ զրույցում նշեց փոխվարչապետ Մհեր Գրիգորյանը։

«Այս սկզբունքների շրջանակներում մենք պատրաստ ենք և միշտ էլ պատրաստ ենք եղել քննարկումների և, ի վերջո, ապաշրջափակմանը, ինչը, իմ կարծիքով, կարևոր նշանակություն ունի նաև Հայաստանի համար»։

Դիտարկմանը, որ հայտարարություններ էին հնչում իշխող ուժի ներկայացուցիչների կողմից, որ ապաշրջափակման դեպքում մաքսային հսկողությունը կարող է իրականացվել միջազգային կազմակերպության միջոցով, փոխվարչապետը ասաց․ «Նման քննարկում այս պահին չկա, օրակարգում նման հարց չենք մշակել։ Նման գաղափարներ շրջանառվել են, բայց այդ հարցի հետ կապված մշակված ձևաչափ չկա»,- նշեց Գրիգորյանը՝ անդրադառնալով, այսպես կոչված, «Զանգեզուրի միջանցքին» մասին ադրբեջանական կողմի հայտարարություններին։

«Միշտ եղել է տարբեր ընկալումների տեսանկյունից, կիրառվել է միջանցք եզրը, շատ դեպքերում հայտարարվել է որպես տրանսպորտային միջանցք, ինչը միջազգային պրակտիկայում ընդունված տերմին է։ Բայց նաև շատ դեպքերում էլ ընդգծվել է միջանցքը այլ վերաբերմունք ունենալու տեսանկյունից։ Մենք մշտապես, երկրորդ տարբերակի հետ կապած տվել ենք մեր պաշտոնական դիրքորոշումը, որ դա ուղղակի բացառած է։ Տրանսպորտային հաղորդակցության մասին մենք միշտ պատրաստ ենք խոսել, միջանցքների մասին, եթե դրա տակ ենթադրվում է հատուկ ռեժիմ, ապա ո՛չ, չե՛նք քննարկել, դա մեզ համար կարմիր գիծ է: Ես չեմ կարծում, որ կկազմակերպվի եռակողմ հանդիպում ու նորից այդ հարցը կբարձրացվի, որովհետև առնվազն դա անիմաստ է, մենք չենք քննարկի նման հարց։ Մենք անվերջ հայտարարել ենք, որ դա կարմիր գիծ է»։