06.10.2026 | 17:26
ԱՀԿ-ն հաստատել է՝ Հայաստանը հասել է հեպատիտ B-ի վերահսկման թիրախներին
Այժմ էական նշանակություն ունի Բաքվի և նախկին ԼՂԻՄ-ում բնակվող հայերի երկխոսությունը․ Շառլ Միշել
Քաղաքականություն
30.05.2023 | 14:54
Եվրոպական խորհրդի նախագահ Շառլ Միշելն անդրադարձել է հունիսի 1-ին Քիշնևում Եվրոպական համայնքի գագաթնաժողովի շրջանակում սպասվող Հայաստան-Ադրբեջանի բանակցություններին։
«Անհամբեր սպասում եմ Հայաստան-Ադրբեջան հարաբերությունների կարգավորման շարունակման քննարկումներին Քիշնևում՝ Ադրբեջանի նախագահ Իլհամ Ալիևի և ՀՀ վարչապետ Նիկոլ Փաշինյանի հետ։ Կարևոր է միմյանց ինքնիշխանության և տարածքային ամբողջականության նկատմամբ հարգանքը վերահաստատելը՝ սահմանների սահմանազատման ուղղությամբ առաջխաղացման, ինչպես նաև սահմանամերձ տարածքներում ռիսկերը նվազեցնելու համար»,- գրել է Միշելը Թվիթերում։
Բացի այդ, նա կարևորել Արցախի և Ադրբեջանի միջև երկխոսությունը։
«Բաքվի և նախկին ԼՂԻՄ-ում ապրող հայերի միջև երկխոսությունն իրենց իրավունքների ու անվտանգության վերաբերյալ այժմ էական նշանակություն ունի։ Կարևոր է զերծ մնալ մաքսիմալիստական դիրքորոշումներից և նպատակադրվել երկխոսության։ Ավելի քան 30 տարվա հակամարտությունից հետո վերքերի ապաքինումը ժամանակ է պահանջում: Համարձակ որոշումներ են պետք»,- գրել է Միշելը։
Հավելենք, որ մայիսի 28-ին Ադրբեջանի նախագահ Իլհամ Ալիևը հերթական անգամ սպառնացել էր Արցախին էթնիկ զտմամբ ու նոր ռազմական գործողությամբ։
Էմմա Չոբանյան
