Հասարակություն
29.05.2023 | 17:07
Ադրբեջանի կողմից 2 հայ զինծառայողի ապօրինի առևանգման դեպքով Միջազգային իրավական հարցերով ՀՀ ներկայացուցչի գրասենյակը դիմել է Մարդու իրավունքների եվրոպական դատարան։ Այս մասին Factor.am-ի հետ զրույցում տեղեկացրեց գրասենյակի մամուլի քարտուղար Հասմիկ Սամվելյանը:
«Ստրասբուրգյան դատարան ենք դիմել միջանկյալ միջոց կիրառելու պահանջով, որով կապահովվի հայ զինծառայողների կյանքի, խոշտանգումներից զերծ մնալու իրավունքը։ Ադրբեջանը պետք է դատարանին ներկայացնի նրանց պահման պայմանները և բժշկական փաստաթղթերը»,- նշեց Սամվելյանը։
Հարցին, թե քանի՞ օրվա ընթացքում պետք է Ադրբեջանը պատասխանի ՄԻԵԴ-ին, Սամվելյանը նշեց. «Կախված է, թե երբ դատարանը կուղարկի պահանջն Ադրբեջանին, դրանից հետո պատասխանի ժամկետ կնշանակվի»։
Հիշեցնենք՝ Պաշտպանության նախարարության տվյալներով՝ մայիսի 26-ին ժամը 19:00-ից մարտական դիրքեր սնունդ մատակարարող ՀՀ ԶՈՒ 2 զինծառայողի հետ կապն ընդհատվել է։ Որոնողական աշխատանքների արդյունքում միջդիրքային ճանապարհին հայտնաբերվել է որոնվող ՀՀ ԶՈՒ 2 զինծառայողների կողմից շահագործվող թիկունքային մատակարարման ավտոմեքենան, որը բեռնված էր սննդով և ջրով՝ նախատեսված մարտական հենակետերի համար: Ադրբեջանական կողմը, սակայն, սադրել է՝ հայ զինծառայողների ապօրինի առևանգումը ներկայացնելով իբրև դիվերսիոն ներթափանցման փորձ։
Ռոզա Վարդանյան
