15.09.2026 | 14:26
Փետրվարի 8-ից «խվատայկաները» կհամարվեն շահումով խաղ․ ՊԵԿ
Եվրախորհրդարանի առաջատար խմբակցության ղեկավարը հայտարարել է, որ այլևս ոչ ոք չի ցանկանում Թուրքիայի անդամակցությունը ԵՄ-ին
Քաղաքականություն
29.05.2023 | 14:23
Եվրոպական ժողովրդական կուսակցության (ԵԺԿ) ղեկավար Մանֆրեդ Վեբերը հայտարարել է, որ ո՛չ Եվրամիությունը (ԵՄ), ո՛չ էլ Թուրքիան այլևս չեն ցանկանում, որ երկիրը անդամակցի ԵՄ-ին։ Նա նշել է, որ Թուրքիայի նախագահ Ռեջեփ Թայիփ Էրդողանն առաջին հերթին պետք է «միավորի ու արդիականացնի երկիրը», ինչպես նաև անհապաղ հավանություն տա ՆԱՏՕ-ին Շվեդիայի անդամակցելուն, գրում է Teller Report-ը։
Ըստ Վեբերի՝ ԵՄ-ն բաց է իր հարևանների հետ համագործակցության համար, սակայն այժմ միությունը համագործակցության կարիք ունի Թուրքիայի հետ «Ուկրաինայի և Ռուսաստանի միջև խաղաղության հասնելու, միգրացիոն քաղաքականության, տնտեսական արդիականացման և Կիպրոսի հարցում»։
«Վերջին տարիները ցույց տվեցին, որ սերտ գործընկերությունը կարևոր է, բայց ոչ ոք չի ցանկանում Թուրքիայի լիիրավ անդամակցությունը ԵՄ-ին՝ ո՛չ Թուրքիան, ո՛չ ԵՄ-ն»,- ասել է ԵԺԿ ղեկավարը։
Թուրքիան ԵՄ անդամակցության հայտ է ներկայացրել 1987 թվականին, անդամակցության բանակցությունները սկսվել են միայն 2005 թվականին։ 2016 թվականին Թուրքիան վերացրել է վիզային ռեժիմը միության երկրների համար։
Միաժամանակ, անցյալ շաբաթ Թուրքիայի արտգործնախարար Մևլութ Չավուշօղլուն հայտարարել էր, որ ԵՄ անդամակցության գործընթացի «վերակենդանացման» հարցում դեռևս հույս չունի։
Տաթև Ֆռանգյան
