Փաշինյան-Ալիև բանավեճ՝ ԵՏՄ նիստին․ Վարդան Ղուկասյանին կալանավորելու որոշում է ընդունվել․ Լուրեր

• Նիկոլ Փաշինյանի և Իլհամ Ալիևի միջև բանավեճ է եղել ԵՏՄ անդամ պետությունների նիստի ժամանակ։ Նիկոլ Փաշինյանը հիշեցրել է, որ չնայած ռուսական խաղաղապահների պատասխանատվության գոտուն, Ադրբեջանը ապօրինի փակել է Լաչինի միջանցքը և անօրինական անցակետ է տեղադրել այնտեղ։ Ալիևն էլ հակադարձել է, որ Հայաստանը Արցախը ճանաչել է որպես Ադրբեջանի մաս։ Փաշինյանը նաև պնդել է, որ Զանգեզուրի դեպքում չկիրառվի միջանցք տերմինը, քանի որ դրանով Ադրբեջանը տարածքային հավակնություն է ներկայացնում Հայաստանին։ Ալիևն էլ ասել է, թե Ադրբեջանը տարածքային հավակնություն չունի Հայաստանի նկատմամբ, և միջանցք բառը չի օգտագործում այդ իմաստով։ Նիստը վարող Վլադիմիր Պուտինը ընդմիջել է բանավեճը՝ նշելով, որ այդ հարցերը կքննարկեն եռակողմ հանդիպմանը։
• Միջազգային ճգնաժամային խումբը (Internationa Crisis Group) նոր զեկույց է ներկայացրել որի համաձայն՝ Ֆրանսիան դիտարկում է Լաչինում ադրբեջանականկան անցակետի տեղադրման խնդիրը ՄԱԿ-ի Անվտանգության խորհրդի քննարկմանը ներկայացնելու հարցը: ԱՄՆ պաշտոնյաները Crisis Group-ին ասել են, որ եթե հարաբերություններն է՛լ ավելի վատանան, Վաշինգտոնը պատրաստ է ավելի կոշտ դիրքորոշում որդեգրել Բաքվի նկատմամբ․ եթե արյունահեղությունը գերազանցի մինչև օրս եղած մարտերի մակարդակը, ԱՄՆ-ը կարող է պատժամիջոցներ կիրառել ու վիզայի արգելքներ սահմանել։
• Քննչական կոմիտեն հայտնել է, որ «Հանրային ձայն» կուսակցության ղեկավարներ հանդիսացող՝ «Դոգ» մականունով հայտնի Վարդան Ղուկասյանի, Արտակ Գալստյանի, ինչպես նաև` երկու այլ անձանց վերաբերող շորթման քրեական գործով Ղուկասյանին կալանավորելու որոշում է կայացվել։ Միջոցներ են ձեռնարկվում Ինտերպոլի միջոցով Ղուկասյանի նկատմամբ միջազգային հետախուզում իրականացնելու և ԱՄՆ-ից Հայաստան արտահանձնելու նպատակով։

Այս ժամի լուրերը՝ տեսանյութում։