Հիտլերի տանը մարդու իրավունքներին նվիրված սեմինարներ կանցկացվեն

Ավստրիայի Բրաունաու-նա-Իննե քաղաքում գտնվող տանը, որտեղ իր մանկության մի մասն անցկացրել է Ադոլֆ Հիտլերը, նախատեսվում է ստեղծել ոստիկանության աշխատակիցների համար մարդու իրավունքների սեմինարների անցկացման կենտրոն։ Այս մասին հայտնում է ավստրիական ORF2 հեռուստաալիքը, փոխանցում է DW-ի ռուսական ծառայությունը։

Ավելի վաղ Ավստրիայի ՆԳՆ-ն մտադրություն էր հայտնել ոստիկանական բաժանմունք բացել Հիտլերի նախկին տանը, սակայն այդ ծրագրերը քաղաքացիական հասարակության ներկայացուցիչների քննադատությանն արժանացան։ Մասնավորապես, Diskurs Hitlerhaus կոչվող նախաձեռնությունը կոչ էր անում ստեղծել թանգարան կամ Հիտլերի տանը քաղաքացիների հանդիպման վայր՝ կրթության և փորձի ու հիշողությունների փոխանակման նպատակով։

Ավստրիայի ՆԳՆ-ի՝ Հիտլերի տան օգտագործման մշակման փորձագիտական հանձնաժողովի անդամներն էլ նշում են, որ նրանց համար գլխավորը «դրական աշխատանքն է», որը պետք է տեղի ունենա այդ վայրում։

«Խոսքը միայն ոստիկանական բաժանմունքի մասին չէ, այլ դրական աշխատանք կատարելու փորձի: Եվ ի՞նչը կարող է ավելի կարևոր լինել, քան երիտասարդ ոստիկաններին մարդու իրավունքների ոլորտում պատրաստելը»,- ասել է հանձնաժողովի անդամ, Վիեննայի համալսարանի պատմաբան Օլիվեր Ռատկոլբը։

2016 թվականի դեկտեմբերին Ավստրիայի կառավարությունն ընդունել, իսկ խորհրդարանն աջակցել էր հյուրանոցի շենքը ազգայնացնելու որոշումը, որտեղ ապրել է Հիտլերը մինչև երեք տարեկանը։

Երկրորդ համաշխարհային պատերազմի տարիներին շենքն օգտագործվել է որպես մշակութային կենտրոն։ Ավստրիայից նացիստների նահանջի ժամանակ նրանք փորձել են պայթեցնել այն, սակայն ժամանակ չեն ունեցել, քանի որ ժամանել են ամերիկյան զորքերը։ Պատերազմից հետո նախ այստեղ գործել է գրադարան, հետո՝ դպրոց, իսկ ավելի ուշ՝ հաշմանդամների արհեստանոց։ 1952 թվականին տունը որպես փոխհատուցում տրվել է ներկայիս սեփականատերերի ընտանիքին, 2011 թվականից այն չի օգտագործվում։

Էմմա Չոբանյան