13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Երևանում ձերբակալվել էր ՌԴ-ում հետախուզվող․ արտահանձնման դեպքում խոշտանգում կլինի՝ ահազանգ ՀՔԱՎ-ից․ ՏԵՍԱՆՅՈՒԹ
Քաղաքականություն
23.05.2023 | 20:10
Մայիսի 3-ին Երևանում ձերբակալվել է ռուսաստանցի դեռահաս Յարոսլավ Ինոզեմցևը, որը մոր հետ Հայաստան էր տեղափոխվել այս տարվա մարտին։ Ռուսաստանում Ինոզեմցևին մեղադրում են դպրոցի վրա հարձակում նախապատրաստելու մեջ։ Անցյալ տարվա հուլիսին ռուսական դատարանը դեռահասին մեղավոր է ճանաչել ահաբեկչական գործողություն նախապատրաստելու, ապօրինաբար պայթուցիկ նյութեր պահելու համար։ 17-ամյա տղան և նրա մայրը, սակայն, պնդում են՝ հայրենիքում իրենք ենթարկվում են քաղաքական հետապնդման։
Թեև դատարանը մեղավոր էր ճանաչել Յարոսլավին, սակայն վճռի հրապարակումից հետո նրան կալանավորելու քայլ չի ձեռնարկվել, ինչից օգտվելով՝ մայր և որդի հեռացել են նիստերի դահլիճից։ Ավելի ուշ պարզվել է, որ նրանք Հայաստան են տեղափոխվել, ինչից հետո ՌԴ Ներքին գործերի նախարարությունը նրա նկատմամբ հետախուզում է հայտարարել։ Շուրջ երկու ամիս անց, ըստ ՌԴ իշխանության, իրենց պահանջով Յարոսլավին ձերբակալել են Երևանում, որտեղ պահվել է մոտ 10 ժամ։
Չնայած ռուսական մամուլը գրում է արտահանձման հավանականության մասին, սակայն Factor TV-ի հարցին ի պատասխան՝ ՀՀ Արդարադատության նախարարությունից տեղեկացրին, որ Ինոզեմցևի հանձման վերաբերյալ միջնորդություն կամ գրություն գերատեսչությունը չի ստացել:
Ըստ ՀՔԱՎ-ի՝ ոստիկանության բաժանմունքում ևս շարունակաբար շրջանառվել է Ինոզեմցևին արտահանձնելու մասին տեղեկատվությունը, ըստ որի՝ արդեն կան արտահանձման մասին փաստաթղթերը և շուտով անձը ստիպված է լինելու հանձնվել։
Յարոսլավի և հակապուտինյան գաղափարախոսությունը կրող մյուս անձանց՝ ՌԴ-ի բանտերում խոշտանգման ենթարկվելու վտանգի մասին ահազանգում է նաև իրավապաշտպան Նինա Կարապետյանցը։
Հայաստանը պարտավոր է ձեռնպահ մնալ ՌԴ-ին քաղաքացիների արտահանձնելու գործընթացից, հակառակ դեպքում, մասնակից կդառնա Ռուսաստանի բռնապետական ռեժիմի կողմից քաղաքական հետապնդման գործընթացին և, ի վերջո, նման մասնակցությամբ կխախտի քաղաքական հալածյալների իրավունքները, հայտարարում է Յարոսլավի պաշտպանությունը ստանձնած Հելսինկյան քաղաքացիական ասամբլեայի Վանաձորի գրասենյակը։
Factor TV-ն գրավոր հարցում է ուղարկել Գլխավոր դատախազություն՝ ռուս դեռահասի գործի մասով հավելյալ տեղեկություն ստանալու համար։
Մանրամասները՝ տեսանյութում։
Ռոզա Վարդանյան
