16.01.2026 | 13:10
Կրկնակի օլիմպիական չեմպիոն Աբդուլռաշիդ Սադուլաևը պայմանագիր է կնքել RAF-ի հետ
Դավթաշենի ղեկավարի տեղակալը հրազենային վնասվածքներով հիվանդանոցում է․ նախաձեռնվել է քրեական վարույթ
Հասարակություն
19.05.2023 | 11:41
Այսօր Բաշինջաղյան փողոցում հնչած կրակոցների հետևանքով հրազենային վնասվածքներ ստացած տղամարդը Դավթաշեն վարչական շրջանի ղեկավարի տեղակալ Կորյուն Մխիթարյանն է։ Վարչական շրջանի աշխատակազմի քարտուղար Մխիթար Մարտիրոսյանը Factor. am-ի հետ զրույցում ասաց, որ Մխիթարյանն այս պահին հիդվանդանոցում է, կյանքին վտանգ չի սպառնում։
Քննչական կոմիտեի մամուլի խոսնակ Գոռ Աբրահամյանը հաղորդագրություն է տարածել ՝ տեղեկացնելով, որ դեպքի առթիվ նախաձեռնվել է քրեական վարույթ սպանության փորձի հատկանիշներով։
«Այսօր Երևան քաղաքի Աջափնյակ վարչական շրջանի Բաշինջաղյան փողոցում հնչել են կրակոցներ, մեկ անձ՝ Կ․ Մխիթարյանը, հրազենային վնասվածքով տեղափոխվել է բուժհաստատություն։
Դեպքի առթիվ ՀՀ քննչական կոմիտեի ԵՔՔՎ Աջափնյակ և Դավթաշեն վարչական շրջանների քննչական բաժնում նախաձեռնվել է քրեական վարույթ՝ ՀՀ քրեական օրենսգրքի 44-155-րդ հոդվածի 1-ին մասի հատկանիշներով (սպանության փորձը)։
Ձևավորվել է քննչական խումբ, իրականացվում է նախաքննություն, որի շրջանակներում քննիչները գտնվում են դեպքի վայրում, իրականացնում են անհետաձգելի քննչական և այլ գործողություններ՝ դեպքի հանգամանքները, այդ թվում՝ հանցագործությունը տուժողի ծառայողական գործունեությամբ պայմանավորված լինելու կամ չլինելու հանգամանքը պարզելու, հանցագործություն կատարած անձանց հայտնաբերելու ուղղությամբ։
Նշանակվել են դատաբժշկական, դատաձգաբանական և դատահետքաբանական փորձաքննություններ։
Դեպքի պարզված հանգամանքների, նախաքննության միջանկյալ արդյունքների մասին ՀՀ քննչական կոմիտեն լրացուցիչ տեղեկատվություն կհրապարակի»,- գրել է Գոռ Աբրահամյանը։
Արաքս Մամուլյան
