Աշոտ Փաշինյանն ու Գայանե Հակոբյանն այսօր կառերեսվեն

Վարչապետ Նիկոլ Փաշինյանի որդին՝ Աշոտ Փաշինյանը  և  զոհված զինծառայող Ժորա Մարտիրոսյանի  մայրը՝ Գայանե Հակոբյանը կառերեսվեն։ Այս մասին հայտնում է փաստաբան Ռուբեն Մելիքյանը։ Թե երբ և որտեղ է տեղի ունենալու առերեսումը, հայտնի չէ։

Մելիքյանի  խոսքով՝ երեկ գիշերը Գայանե Հակոբյանին Էրեբունի Բժշկական կենտրոնից տեղափոխել են Ձերբակալվածներին պահման վայր։ 

«Տեղափոխել են՝ հիվանդանոցի բազմաթիվ մուտքերից մեկով, որի առջև այդ պահին մարդիկ չեն եղել։ Այսօր նախատեսվում է տիկին Գայանեի առերեսումը Աշոտ Փ.-ի հետ, որը պնդում է, թե տիկին Գայանեն իրեն առևանգել է։

ՀԳ. «Անհայտ» ճանապարհով ՀԺ-ի տրամադրության տակ հայտնված «հայտնի» տեսագրությունը դիտած մարդկանց ուշադրությունն եմ հրավիրում այն հանգամանքին, որ մեքենայում այդ պահին եղել են միայն երկու անձ՝ տիկին Գայանեն (վարորդ) և Աշոտ Փ.-ն (ուղևոր): Վերջինս պնդում է, որ այդ պահին ինքն առևանգված է եղել», Ֆեյսբուքի իր էջում գրել է Ռուբեն Մելիքյանը։

Հիշեցնենք, որ երեկ միջադեպ է տեղի ունեցել  Աշոտ Փաշինյանի և Գայանե Հակոբյանի միջև, որից հետո Փաշինյանը հաղորդում է ներկայացրել իրավապահներին այն մասին, որ Վերաքննիչ դատարանի դիմացով անցնելիս է եղել, երբ հանդիպել է  2020թ․ պատերազմի ժամանակ զոհված զինծառայողների ծնողներին, որոնցից մի կին  մոտեցել է իրեն, նառաջարկել է նստել մոտակայքում կայանված իր ավտոմեքենան, որպեսզի կարողանան հանգիստ զրուցել: Երբ նստել է մեքենան,կինը սկսել է խոսել 2020թ․ պատերազմից, տարածքային ու մարդկային կորուստներից։ Տեսնելով, որ վերջինս դրսևորում է ոչ ադեկվատ վարքագիծ, երթևեկում է արագությունը գերազանցելով՝ երթևեկության կանոնների խախտմամբ, պահանջել կանգնեցնել ավտոմեքենան, որպեսզի ինքն իջնի: Նշված կինն ասել է, որ իր տղային առանց իրեն հարցնելու տարել և սպանել են, ինքը կորցնելու ոչինչ չունի, կարող է նրան սպանել, ուստի առանց հարցնելու իրեն տանում է Եռաբլուր, որտեղ, իր էմոցիաներից ելնելով կորոշի՝ ազատ թողնել, թե ոչ: 

Համացանցում տարածվել է տեսանյութ, որում երևում է, որ  Աշոտ Փաշինյանը մեքենայից դուրս է թռչում։

Թե դեպքն ինչպես է եղել և  մեքենայի մեջ ինչ խոսակցություն է եղել, այս մասին Գայանե Հակոբյանի տեսակետը մեզ հայտնի չէ, բայց հաշվի առնելով, որ առերես հարցաքննություն կատարվում է այն դեպքում, երբ անձանց ցուցմունքները հակասում են միմյանց, կարող ենք եզրակացնել, որ Փաշինյանի  և  Հակոբյանի ցուցմունքներում էաական  հակասություններ կան։

Արաքս Մամուլյան